近排曝光率愈嚟愈頻密嘅數碼港貝沙灣，淨係會所都有排軟銷，皆因對象係識得享受生活嘅人士，會所各項設備自然講究，用唔同主題區域包裝，以健康同美容做主題嘅部份，重搵嚟城中星級水準嘅髮型師、美容師助陣，來頭幾猛。唔少明星、名媛追捧嘅IiColpo髮型設計護理，就係其一，合夥人之一嘅RickyKwok，重係好多明星御用髮型師。
除此之外，水上設施亦零舍豪，戶內外各有兩個泳池，重有6個有齊冷熱水、香薰、礦物鹽同日式風呂等多種選擇嘅水療按摩泳池。
特別之處係室外溫泉池地台，鋪平時好少見嘅熱石，住客浸完溫泉上岸，地面有陣熱氣，唔使凍親，認真照顧周到。聽講，呢招係電盈基建主席李智康外遊嗰陣偷師學番嚟嘅，將條橋用喺貝沙灣。
會所用積分制使用設施，因應住客所購單位面積，送乘大300倍會所積分，以千五呎單位為例，就有四十五萬分，用喺美容、理髮同健身方面，就可以免費使用138次。
港島十八個主要豪宅，售價舊年跌咗11%，平均每呎5250蚊，但係因發展商惜售，將唔少單位轉售為租，甚至連發售嘅新盤都保留部份出租，搞到租金跌得勁過售價，達19%。
卓德測量師行最新物業報告話，為咗盡快租出單位，唔止態度軟化，有啲甚至要畀兩個月佣代理，同提供搬遷津貼。就算有租客提出只租半年，都有業主肯制。
講番豪宅買賣，卓德話政府公布嘅新措施，有利交投，不過，因為全球經濟都未明顯復甦，估計買賣以自用為主，表現就無可避免會隨經濟上落。今年逾千萬元嘅成交應該唔少，價錢就冇乜起落，但新盤造價會因供應多而受壓。今年推售嘅豪宅盤有何文田的何文田山一號（圖二）、九龍塘畢架山一號等。
近排係代理行飲飲食食嘅月份，利嘉閣大圍、沙田同馬鞍山區高級域區經理韓正鴻、馬鞍山區經理吳家榮，同海栢分行經理宋良安，日前夾錢請同事食團年飯（圖三），總共有十幾人去西貢食海鮮。每名同事重有獎金做鼓勵㖭，最開心應該係該區topsalesJennifer，攞到五千蚊獎金。
另外，中原精英會今日有聚餐，全部都係好數之人，包括千萬主管康樂園分行經理周文豪。
年近歲晚，樓市都會淡靜啲，二手業主若要賣樓，就要收順啲至得嘞。中原地產分行經理蔡創文話，沙田希爾頓中心A座低層三室，659呎，向東南河景，原業主舊年11月底放售，開價125萬，近日有買家睇樓，還價100萬，雙方傾咗兩個鐘，終於以103萬成交。蔡創文指呢單交易反映業主心態好弱，寧願平啲都要套現離場。
旅遊事務署最近為推廣本港嘅好客之道精神，搵美聯幫手拍咗輯廣告，由新文華中心分行客戶經理呂小芬（圖四），飾演招待一名韓國商人租用寫字樓嘅客戶經理。廣告已喺上個禮拜出街。
呂小芬話外國人好重視合約精神，所以事前要準備好文件，同埋提供充足資訊。佢又透露，外國客對業主反價好反感。咁大家日後知到點應付啦！
另外，廣州市國土資源和房地產管理局，舊年就全市777家地產中介公司進行資質評定，有十四家公司獲評為一級，美聯亦有份。
廣州美聯區域經理潘偉雄話，公司為要本土化，所以超過九成係當地員工，以本土人嘅人脈關係同對市場嘅掌握，再結合外資嘅管理經驗，可提高競爭力。
蘭西
電郵地址：
