阿仙奴對費布洛治呢場足總盃第四圈比賽，雖然係強弱懸殊之戰，不過有個費布洛治擁躉，就向英國博彩公司威廉希爾買咗一千鎊（約一萬二千五百港元）喺費布洛治身上，中正嘅話就有超過一百萬鎊，係足總盃歷來最大嘅派彩。
呢位叫做田杜嘅費布洛治擁躉，好豪咁買咗六百五十鎊費布洛治會贏阿仙奴（四十一倍）、二百五十鎊費布洛治對阿仙奴時會先開紀錄（十三倍），同埋買一百鎊費布洛治會捧盃（一萬零一倍），全中就會獲得一百零二萬九千鎊（約一千三百萬港元）。
雖然呢個派彩數目驚人，不過威廉希爾嘅發言人沙柏就話冇有怕，佢話：「如果田杜真係中嘅話，即係話其他買咗阿仙奴、曼聯同埋車路士嘅球迷輸晒，咁我哋咪即係贏咗大錢囉！」
講開阿仙奴，我求大俠就要讚吓佢哋嘅年輕後衞厄遜醒目，識得推咗唔轉會去要打護級戰嘅伯明翰住，睇定啲先，因為隊友基昂喺呢個月二十九號對利物浦嘅大戰停賽，而施根重未好番，所以厄遜或者有機會出場踢，如果到時佢都冇份，嗱嗱臨喺截止轉會限期未完之前走人都未算遲。
或者受車路士前鋒古莊臣自爆豪賭欠巨債呢單新聞影響，英國《太陽報》前日就獨家披露有個大名鼎鼎嘅英格蘭國腳，喺世界盃期間同隊友對賭，輸咗三萬鎊（約三十六萬港元）。另外，連效力曼聯嘅荷蘭前鋒雲尼斯達羅，亦爆響口話佢嘅「紅魔鬼」隊友不時都賭啤，重連領隊費格遜都有份！睇嚟英球壇人士想遏止賭風都唔係咁容易。
「巨無霸」奧尼爾（早前衰多口模仿中國口音寸姚明，搞到要出嚟公開道歉，為咗證明佢嘅誠意，「巨無霸」最近更專登學咗啲半鹹淡嘅中文，準備喺星期六作客火箭時，親自向「明王朝」道歉。不過據我求大俠所知，「巨無霸」原來對中文一知半解，學咗句廣東話嘅「對唔住」，而唔係國語嘅「對不起」，到時同姚明道歉真係雞同鴨講囉！
波神米高佐敦講明，如果喺明星賽做唔到東岸明星隊正選後衞，寧願唔打明星賽。波神𠵱家喺明星賽嘅票數遠遠落後麥基迪同艾華遜，九成冇機會打正選。不過我大俠估計，由於波神打埋今季正式退休，NBA官方肯定會全力游說波神打埋呢場告別明星賽，作為向全球嘅球迷同傳媒道別，波迷可拭目以待。