貿易發展局噚日搞咗個「香港時裝展」，展出二○○三秋冬系列，個Show一連四日喺會展舉行，重請咗特首夫人董趙洪娉主持開幕禮，認真巴閉。貿發局雖然冇請八方，但八方都去睇吓今年興邊款時裝，同埋睇吓董太着嘅衫合唔合潮流。
話說董太一主持完開幕禮，就即刻開始行展覽會，八方一路跟到實，寸步不離。董太行咗半個鐘都未停過，終於去到一個賣紅酒嘅攤位，諗住想停吓，飲番啖酒解吓渴。攤位老細亦好識做，即刻叫人倒咗杯香檳畀董太品嘗，董太正想飲之際，多次有記者要求佢擺甫士影相，搞到董太等咗好耐都飲唔到香檳。
最後董太忍唔住，講咗句「CanIDrink?」（我飲得未？）記者都唔好意思再叫佢影相，董太至可以飲番啖香檳，飲過香檳，董太即刻精神晒，又再行過，而且行得重快過之前。到董太離開時，八方睇一睇表，發覺佢行咗七十五分鐘，重一啲疲態都冇，絕對拍得住「七十一」嘅董特首。
（圖）記者猛叫董太影相，搞到佢好難得至飲到啖香檳，不過好過後面嗰兩位模特兒得個望字。 區民傑攝
傳真︰2623-9278
電郵︰