話咁快又到一周腦場硬件走勢報告，今次搵嚟灣仔電腦城富利電腦嘅阿偉，同大家講吓近期三款至Hit至抵玩產品，等大家享受砌機升級樂趣之餘，重可以幫你荷包盡慳。
記者：徐影龍
據阿偉表示，雖然首部支援PalmOS5嘅SONYNX70V推出已經一段時間，不過近排腦場水貨銷情不俗，多咗好多新買家入貨。估計NX70V突然再受熱捧原因，可能同《掌龍》推出正式版有關，之前日文水貨機嘅中文兼容性極差，一眾中文外掛軟件始終問題多多，而《掌龍》就真正完全支援到全中文顯示，令較便宜嘅水貨機銷量稍升。不過如果你係追新機一族就要留意，SONY即將於2月推出內置藍芽的新型號NZ90，估計叫價要六千以上，點揀自己諗清楚。
Intel嘅GL底板已停產一段時間，新貴除咗有支援最新P43.06GHz嘅845PESVL外，舊型號845GRGL都仍然有好多砌機一族搵緊，原因除咗採用整合圖像晶片嘅i845GChipSet外，重比GL底板多一條AGP槽，升級較為方便。當然唔少得內置LAN插頭，賣價$790算幾抵玩，要注意係845GRGL最高只支援P42.8GHz處理器，讀者千祈唔好貪平入錯貨。
硬碟喺市場上嘅趨勢係容量愈嚟愈大，價錢卻成反比咁降低。目前最流行為80GB容量，IBM內置2MBBuffer型號賣價約$760，而Maxtor有款同樣內置2MBBuffer及7,200轉，不過支援ATA133制式，傳輸速度更快，價錢卻只比舊有ATA100貴少少，賣$780，趁新年砌新機嘅用家不妨考慮。
富利電腦（灣仔電腦城）
報價熱線：28933106