以前每逢臨近新年，老媽子都會預早帶我哋幾姊妹去剪個靚髮，唔使拖到年尾要畀「雙工」。唔知係咪𠵱家市道唔好，大部份Salon唔單止無收「雙工」、「三工」，重下下講求全套服務，出盡法寶，等你可以在剪個靚髮之餘，順道享用上網、睇VCD、做Spa、腳底按摩、Facial等額外貼身服務。
想知道𠵱家剪髮可以有幾歎，以下三間Salon可謂當中的典範，趁住農曆年前不妨親身感受吓。
記者：尹珊珊 攝影：陳穎 ImageGirl：Marcella
逢星期一至四刊出
位處中環蘭桂坊這個集合全港型男索女的出沒點，名人明星客多籮籮，剪頭髮隨時可以見到心儀偶像在你左近。基本上由踏入「tripleedge」開始，已經有一隊Staff等住serve你，論排場最有睇頭。
佔盡全層5千呎的剪髮區，地方極為寬敞，設有2間獨立VIP房（附加$120），部份按摩房和浴室設於同層末端，一字排的雜誌櫃放滿各路本地及外地雜誌，種類之多足夠你消磨整天，你甚至可以趁住整頭髮的空檔，同時享用美甲、腳底按摩等服務，享受所謂一條龍的扮靚服務，的確可以慳番唔少時間。
女士們若想令扮靚效果更上一層樓，可乘搭電梯上18樓，直入男士禁足的沐蘭Spa，進行Facial、BodyMassage、Hydro-Bath等全面護理。當然，要享受一連串五星級服務，又或者想大師級Stylist為你親自操刀，請事先預備足夠彈藥。
「香港無乜Salon可以提供到咁全面嘅一條龍FullService，客人可以剪完頭髮再沖番個涼先走，又或者做埋facial、修甲、腳底按摩都得，尤其係去party的時候，客人可以一次過執到靚靚，夠晒方便。」
地址：中環德己立街1號世紀廣場3樓
電話：31020238（Salon）31020208（沐蘭）
收費：剪髮$400-$1,500 染髮$700起 電髮$650起
備註：各項服務（除剪髮外）需另付洗髮及吹髮費用
位處同屬蘭桂坊一帶，「HAIRSIXTYONE」卻有着不一樣的風情。走小店形式的經營路線，地方細細，剪髮區僅可容納10個座位，也沒有名牌Salon那股令人受不了的氣燄，取而代之是一份簡單而親切的感覺，從服務員的笑臉比其他Salon多便可以看得出。所以在這兒你可以有如置身屋企般，隨意在櫃枱上拿取VCD收看，在Reception處上網和打機，吃着店子為你提供的飲料和小餅乾，好好消磨電髮和染髮的漫長時間。
「呢度唔似名氣大的Salon咁有排場，但勝在簡單親切，最緊要畀到人有舒服的感覺，好似客人可以自己揀VCD睇，同埋室內裝潢以鮮橙色為主，都係因為想畀人感覺開心啲，面色睇落會靚啲。」
地址：中環雲咸街31C-D地下
電話：25256361
收費：剪髮$300-$650 染髮$600起 電髮$300起
備註：各項服務（除剪髮外）需另付洗髮及吹髮費用
計年資，BEIJINGHairCulture是三間Salon之冠，唔計尖沙嘴北京道那三年，在凱悅酒店商場已盤踞了超過十個年頭。現時客人以太太們居多，其次就是白領一族，能夠有辦法冧盡出名數口叻又精明的師奶，貼身服務固然少不了，最欣賞是這兒的座位夠闊落，唔似得其他Salon咁地方盡用，座位與座位之間以partition稍作分隔，令每位客人都有私人空間，唔使你眼望我眼咁有壓迫感，另外亦有一間雙人VIP房，照顧形影不離的情侶客人，再豪氣一點，加$200可享用被我朋友兼用家喻為全港最靚的貴賓室，提供VCD機、有線電視、獨立音響、免費小食等，地方光猛寬敞，打幾個觔斗都唔會撞到牆。
「𠵱家做Salon唔可以再用以前嗰套，以前嘅Salon可能會畀人好寸、好cool的感覺，但𠵱家客人鍾意有貼身服務，唔再係剪吓頭髮咁簡單，所以熱誠好重要，等客人可以放心交個頭畀你。」
地址：尖沙嘴彌敦道67號凱悅酒店商場地庫B18-19
電話：23666208
收費：剪髮$300-$880 染髮$500起 電髮$650起
「新年唔會特登去剪頭髮，通常係覺得有需要或者想轉髮型先剪。」至於Salon的要求，Ivan話就腳就可以，而Vicki始終都係女仔，認為除咗髮型師要剪得好，地方都要夠企理。
「去開嗰間Salon幫襯咗兩年幾，覺得個髮型師都幾好，唔使我諗已經剪到我嘅要求，其他服務反而唔係咁重要。」
「平時習慣每個月都會剪頭髮，今年新年前都會去剪一次，如果要畀貴少少都無所謂，不過我估𠵱家新式Salon都好少有收雙工呢一套啦！」
「Salon的服務梗係重要，話晒將成個頭交畀佢，如果環境靚就最好啦！我以前每逢新年都會去剪頭髮，不過今年就唔會，因為要溫書考會考囉！」
隸屬時裝店旗下，近幾年冒起得最快的大型Salon之一，現時分店有7間，客人主要是年輕人及白領，規模大，以客為尊，對效果唔滿意可於一星期內免費重做相同服務。
地址：銅鑼灣利舞臺廣場二樓
電話：25252525
收費：剪髮$400 染髮$$400-$1000 電髮$400-$1000
優惠：星期一至日學生剪髮$100（中環太子大廈分店除外）、星期一至五電髮染髮半價優惠（只限中環太子大廈分店）、星期一至五任何髮型服務半價優惠（紅磡黃埔花園及屯門市廣場優惠期為星期一至日）。
擺明車馬走大眾化路線，剪洗恤收費不過是$56，同屋邨髮廊有得fight，分店遍布旺角、灣仔、佐敦至北角，有特價套票發售。
地址：旺角窩打老道65號地下
電話：27608938
收費：剪髮$56 染髮$99起 電髮$150起
曾經叱咤一時的大型連鎖Salon，當年由薛芷倫擔綱的廣告仍令人留有印象，雖然近年風頭已被一眾明星級Salon蓋過，但仍有唔少太太客捧場，現在太古、綠楊新邨、黃大仙、康怡設有分店。
地址：九龍灣德福廣場1期2樓17號舖
電話：27552055
收費：剪髮$220 染髮$150起 電髮$400起
一度與海濤髮型齊名的連鎖Salon，今日雖已不復當年勇，但分店仍遍布黃大仙（3間）、九龍灣、沙田、太古、天水圍，由於主攻屋邨師奶客，價錢大眾化，仍有一定捧場客。
地址：沙田新城市廣場第1期5樓
電話：26996588
收費：剪髮$109起 染髮$224起 電髮$350起