梁朝偉在電影《行運超人》中為救女友楊千女華，本來要齊齊在海中被雷劈，但拍攝當日因天氣寒冷及楊千女華不懂游泳，所以二人改在船上攬住被雷劈，千女華更稱此情此景十分浪漫。
楊千嬅和梁朝偉主演的電影《行運超人》，將於新年檔期上映，其中一場戲講述偉仔為救楊千嬅，兩人在船上被雷劈，變為爆炸頭，搞笑之餘亦十分浪漫。而千嬅的爆炸頭假髮，原來曾於林海峰拉闊音樂會任嘉賓時戴過。
楊千嬅昨日接受電話訪問時說：「呢場戲我同偉仔喺船上面拍咗三日，劇情講我同偉仔拍緊拖，我俾人捉咗上船，偉仔滑水追上船嚟救我，兩個重一齊攬住俾雷劈，都幾浪漫㗎，其實嗰幕係想講情侶應該有禍同當。」
梁朝偉要拍攝三天滑水戲，適逢日前氣溫驟降，十分辛苦。而千嬅因不諳泳術而不用落水，她說：「場戲喺西貢附近嘅海灣拍，拍嗰陣啱啱寒流到，氣溫得十度以下，偉仔雖然着咗潛水衣，但都好凍，好辛苦。我就冇咁慘，全程喺架船度，本來導演要求我同偉仔一齊落水，但我唔識游水，所以拍唔到。」
千嬅更大讚偉仔滑水有型，稱對方是「水上飄」，她說：「佢真係識滑水㗎，重好勁㖭！佢係水上飄。」對於自己的爆炸頭，千嬅說：「呢個假髮係我早排出席林海峰拉闊音樂會時戴嘅，嗰次係紫紅色，今次重新染過色，我覺得幾靚。」
對於《行》片票房，千嬅坦言有壓力，她說：「因為我第一次拍大檔期片，壓力有㗎，今次群戲多幾好玩，拍住偉仔、Ronald（鄭中基）同杜汶澤，佢哋都係好戲之人，咁我嘅信心都增強咗。」
採訪：張止寒
