翻閱過朋友F送嘅《大上海小心眼》，食午飯時候，碰到W太。W太嘅英明丈夫，舊年俾公司調去上海開拓中國市場，W太大概久聞上海寶貝嘅威力，一於做跟得夫人，逢星期四到上海，星期一返香港，兼顧自己喺香港嘅生意及老公在上海嘅大屋。據W太講，租三千呎獨立屋，一千呎花園，入伙前要業主裝修咗十五萬人民幣，都只不過月租三千美元，佢自己覺得相當抵。靚女M坐喺W太身旁，嘩一聲：「八年前我做公司駐上海代表，租七十平方米公寓，都要月租五千美元喎，乜𠵱家咁平？」
W太話：「唓，上海新樓多多，照我所見，十室九空，啲業主睇怕係投資者，唔係自己住嘅。我間屋嘅業主係台灣人，台灣佬就最鍾意買上海樓收租，睇怕要蝕晒頭注。」
W太又注意到，一啲喺上海爛尾幾年嘅樓，重新包裝之後，趁着全球一片上海熱，喺香港推出，完全唔喺上海公開發售，以免被當地人拆穿。左丁山即刻問佢：「邊間呀？」W太笑笑口：「你要買邊間，問過我先啦。」
聽W太講上海，想起上星期《信報》副刊有一個欄「上海通信」，向上海大潑冷水，話內地網站有篇長文，令上海人議論紛紛，因為文章指上海係「紅吊機」（即我哋嘅起重機）經濟，一旦基建工程、樓宇建設工程停止，上海就冇嘢睇，上海經濟一味要靠外地投資房地產、基建嚟維持繁榮，一旦起吊機停擺，上海就……