好多人都知道日本樂隊SouthernAllStars嘅主將桑田佳祐，除咗好有音樂才華之外，佢為人都好鬼搞笑，經常會公開講吓不文笑話娛樂大眾，近日我大口羅拉挖到料，原來平日桑田佳祐喺錄音室鍾意研究吓成人雜誌，用嚟relax吓喎！
早排以個人名義出碟嘅桑田佳祐，最近推出咗一張《WonderWear》DVD，封面、歌詞小冊同DVD嘅Menu都出現一個又着又除男人內褲嘅西洋靚女，概念十分搞鬼。
而DVD嘅bonus片段亦都好過癮，裏面拍低咗桑田喺七日內錄成一首歌嘅絕密片段，當中就公開咗佢喺錄音室睇成人雜誌研究AV女郎嘅情況。桑田重好識分甘同味，會同Studio嘅工作人員分享鹹書，齊齊研究㖭！
不過，桑田佳祐並唔係只會沉迷睇鹹書嘅，佢另一個調劑方法係同工作人員打吓枱波，極之健康。而桑田一埋位工作嗰陣，就會十分認真，重一手包辦埋結他、Bass、鼓同鋼琴嘅演奏，都咪話唔厲害。