電影《無間道》昨晚慶祝票房突破五千萬，與此同時，早前因撞膊事件而鬧不和的余文樂和陳冠希，亦在傳媒面前上演一幕「冰釋前嫌」，二人又攬又抱狀甚老友，猶如拍戲一樣。
余文樂與陳冠希（Edison）早前因為「撞膊事件」而爆粗，更幾乎大打出手。昨晚兩位冤家在撞膊事件後首度碰面，齊齊出席中環麗嘉酒店舉行的《無間道》慶功宴，余文樂於晚上七時抵達，Edison則在半小時後才到達。
余文樂與Edison進場後分枱而坐，及後兩人與其他《無間道》幕前幕後工作人員上台，準備進行破冰儀式，中間也要隔着劉德華。余文樂不時望向Edison，但Edison未有理會，自顧與身邊工作人員傾談。
及後余文樂從華仔背後伸手捉住Edison，然後又攬着對方，Edison見狀即攬實對方回敬，二人並咬耳仔咬足一分鐘。其間聽到Edison頻頻點頭說：「我知道。」
而在余文樂跟Edison傾談期間，有記者高聲嚷着說：「好啦，好啦，握手言和啦！」Edison聞言即一臉不悅地說：「你講乜嘢呀！」
之後，余文樂又兩度捉實Edison咬耳仔，甚至攬着Edison的腰，但當破冰儀式及大合照過後，Edison即九秒九彈開，而余文樂則趕着去拍戲，但他不忘跟Edison握手道別。問余文樂跟Edison傾甚麼時，他說：「咪講番件事，同埋叫大家以後畀心機做嘢。」
事後Edison說：「我哋不嬲都冇嘢，六、七日冇見都好掛住佢，我哋頭先咬耳仔係講mantalk。」問Edison來前可有想過要說甚麼，他說：「我又唔係求婚，點解要諗定講乜嘢。其實呢幾日報道打交、嗌交同爭女，都係誤會，將小事搞大，大家都知乜嘢事，我同佢傾過偈，nobadfeeling（沒有壞感覺），將來可唔可以做到朋友就未知，但約食飯係唔使刻意。」
問Edison跟余文樂是否有個好開始，Edison說：「乜講到佢好似我女友咁，𠵱家我只想拍好《無間道》前傳，做唔做到好朋友要未來大家合作，見面交談先知。」Edison可覺二人是好朋友關係？他說：「一向係朋友，只係唔係好朋友，做朋友下一步先攞電話號碼，我對佢（余文樂）朋友感覺多啲。」
採訪：魯萍、馮美茵
攝影：仇志德、陳志嵐
