深港兩地好快就會實施二十四小時通關，大家都好關注新界北區樓市變化，最擔心港人鍾意返內地消費，只會帶旺內地零售同住宅市道，拖垮本地經濟，但原來內地人正打新界北區物業嘅主意！
美聯高級營業經理羅英傑話畀蘭西知，啱啱有名中港兩地走嘅內地商人，買咗粉嶺中心四座高層兩房單位，469方呎，成交價八十四萬，每呎1791蚊，重係一次過付款。
羅英傑話，該名商人𠵱家住喺深圳布吉，經常出入深港兩地，為咗方便，決定喺香港買個近火車站嘅單位。佢重話，呢類型買家同租客，近期有增加趨勢，估計佔三成，帶旺咗區內一百萬元物業交投。
至於鄰近地區上水歐意花園，最近就以三百八十萬成咗間單號屋，二千一百方呎，買家係經常返內地嘅港人。
睇嚟都唔使咁驚，有米嘅內地人可撐住樓市。
上個月賣出嘅山頂和福道19號大屋（圖二），買家身份終於曝光，係資深大律師陳志海，成交價4028萬。
陳律師喺行內好出名，又係李柱銘嘅徒弟，打親嘅都係轟動全城嘅大案，見報率好高。近排就代表華懋王廷歆打贏咗單跨世紀遺產爭奪案，間屋好可能係獎勵自己嘅禮物，聽代理講陳律師住開山頂，今次入市係換樓自住。呢排忙緊葉劉淑儀夫家單爭產案，葉家長孫葉天賜就請咗陳律師幫手。
農曆年前唔少公司都會搞年夜飯，慰勞一下員工，中記就揀今個月22號，喺灣仔會展搞餐舞會，聽講本來已經唔夠坐，但因重要請好多發展商，據聞可能有三分之一員工冇得玩。
而美記就同舊年一樣，公司出錢，各區自己搞，今年會分港島、九龍、新界、工商舖同中國部五個區，夾埋約莫二百五十圍。美聯主席黃建業每區都會出席，相當唔得閒。
另外，香港置業嘅豪宅組，就率先喺上個禮拜搞咗，董事胡日發（圖三左）同今日生日嘅執行董事陳坤興（圖三中），重即場合唱一曲「一起走過的日子」，寓意同員工甘苦與共。
舊年賣樓都幾豐收嘅長實，嚟緊重有大把樓要賣。上半年就有紅磡都會軒、畢架山一號同荃灣朗逸峰，下半年就更多，論規模龐大，就有將軍澳調景嶺站上蓋成三千幾個單位嘅項目。
聽講，長實售樓部就快有新帥加盟，傳聞職級係總經理，幫手賣樓之餘，重會搞租務，今個月底前返工。
趙董（執行董事趙國雄）話，位猛將係行內人，但係邊位就要賣個關子。新頭頭會唔會令長實賣樓更如虎添翼，「計仔」更加多，就要拭目以待嘞。
蘭西
電郵地址：
