有個老竇大把生意嘅老闆仔，鍾意媾女好多人都知，但媾到連自己個何B仔都爛埋，佢都算誇張。馮仁昭最近同啲醫務界朋友傾偈，佢哋講起老闆仔最近上咗去睇皮膚科醫生，當佢除咗條褲畀醫生睇嗰陣，發現佢嘅何B仔潰爛晒，醫生話佢係有性病，不過叫佢唔使驚，一定有得醫，但醫生就吩咐佢暫時唔好玩住，等慢慢醫好個病先。
醫生重話擔心佢係俾性伴侶傳染佢，所以叫佢最好同個女友傾吓，點知佢一面為難，佢後來重同醫生講，自己女朋友太多，而且全部都係鬼妹，究竟係啲女傳染畀佢，定係佢傳染畀人，連佢自己都𢱑晒頭，不過為咗個何B仔着想，佢呢輪都唔敢玩得咁盡。
導演唐季禮同演員胡兵應香港貿易發展局邀請，噚日喺機場出席首屆「香港國際時尚薈萃」展覽會。為隆重其事，大會特別花費咗十幾萬租咗架私人飛機接佢哋嚟。唐季禮近排忙緊新片《花木蘭》嘅籌備工作，佢話會邀請一位華人女演員演出，不過為咗賣關子，暫時唔公布住。
羅敏莊、陳敏之同洪天明噚日去啟德「環球嘉年華」拍攝賀年歌MV。
羅敏莊嘅好友相繼拉埋天窗，問佢幾時同男友陳國邦結婚，佢笑住話：「重未儲夠錢，𠵱家男女平等嘛，或者等我中咗一千萬六合彩嗰陣，我先會叠埋心水結婚生仔。」而陳敏之玩「天旋地轉」機動遊戲時，嚇到花容失色，因為佢啱啱食完午飯，所以玩完遊戲後，佢就想嘔。
車婉婉、苑瓊丹、堪輿學家麥玲玲同李丞責噚日去尖沙嘴出席無綫新節目《玄妙無窮》記者會，婉婉被相士話個相旺夫益子，苑瓊丹重踢爆佢有個固定男友，不過婉婉就否認。對於早前有報道話陳冠希同張栢芝喺佢母親開嘅食店撐枱腳一事，婉婉話：「我兩個都熟，不過冇諗住問。」
梁朝偉同張曼玉日前喺台灣分別為《英雄》宣傳，前日兩人一齊搭七點幾嘅航機走人，而同一日劉嘉玲就乘搭六點嘅航班飛抵台灣，以浪琴表代言人身份出席活動。劉嘉玲同梁朝偉呢對情侶，喺台灣緣慳一面，唔知有冇玄機呢？
張藝謀一向以嚟都係拍藝術電影建立影壇地位，對於樂壇，佢反而唔係太熟悉，日前佢喺台灣出席電影《英雄》宣傳活動時，對於台灣人氣組合F4竟一度以為係飛機嘅名字，佢話：「剛聽到時我還以為是飛機的名字，後來我才知道那是四個人的偶像團體。」
譚詠麟日前接受港台節目訪問，破天荒大談太太，噚日佢再到港台接受訪問時話：「冇乜大不了啫！」但當問到佢子女嘅近況，佢笑住話：「哈哈哈！家家有本難念的經！」
至於佢同克勤嘅演唱會，決定再加開兩場日場，佢話：「本來問接住開演唱會嘅陳奕迅攞兩日，但係佢哋要整台唔得。」
