繼三位醫生局長同台「開診」之後，噚日嘅施政綱領記者會，兩位局長組合亦相當有趣，由堪稱政務官中嘅「老大哥」孫公，同政壇新星廖秀冬拍住上。
孫公應付傳媒出名滑不溜手，噚日俾記者兜口兜面質疑，丁屋政策檢討咗咁多年，都未知檢討出乜嘢結果。孫公第一時間讚個記者問得好，然後即刻聲明自己用嘅字眼一向好小心，從來冇話過五年內可以解決，只係話五年內會去傾。不過孫公噚日竟然將「拆卸」讀成「拆御」，又真係老貓燒鬚。
至於民望居首嘅廖局長，原來真係好討厭以勢逼人，噚日被問到港珠澳大橋進展，佢話涉及到合作夥伴珠海、澳門同廣東省政府，所以唔想單方面宣布，免得令人哋感到有壓力。廖局長又信心十足咁話唔覺得條大橋會有乜嘢問題，唔通佢連中華白海豚都搞掂埋？
傳真︰2623-9278
電郵︰