臨近新年，好多人都會組成一班師奶團，齊齊上深圳辦年貨。但我就覺得，幾個人盲摸摸去買嘢，容易俾人呃又唔知啲貨靚唔靚，始終買得唔夠放心。所以我都係選擇跟旅行社嘅年貨團去掃貨，一來自己唔熟深圳的地道購物點，跟團就可以輕鬆放心買個夠。最近我同一大班朋友就參加了一個$78嘅年貨團，午餐重可以去五星級酒家食杭州菜，一百蚊唔使就可以短線遊兼Shopping，一舉兩得。
記者：黃希知 攝影：Manny
ImageGirl：Irene
鳴謝：匡域旅遊
由羅湖火車站坐約半小時車程，就去到位於福田區的農科中心花卉總滙，遠看雖然比較簡陋，但入到去見到成個用鐵皮搭建而成的花卉市場，擺滿各式各樣的鮮花，價錢豐儉由人，絕對令人目不暇給，愛花之人見到必定會愛不釋手。
開運竹是新年受歡迎的盆栽之一，花卉市場當然不會少了它的份兒，最細盆售?8，最大一盆亦只售?75，若然買返香港的話亦不用擔心，因為老闆會幫你包裝好，攜帶十分方便。Irene見售價咁平都忍唔住選購了一盆，希望可以在來年帶來好運！
過千呎的花卉世界放滿不同的花種，除富貴竹和水仙頭外，鮮花款式亦不少，但由於鮮花多數較大盆，所以若想買盆返香港的話可能會比較困難，所以奉勸大家都係揀細盆為妙！
入到花卉市場內，見三個店員埋頭苦幹，各人正用刀仔𠝹水仙頭，只見每個人手起刀落，由紙皮箱攞出水仙頭一刀一刀將頂部𠝹開，即𠝹即賣。水仙頭有大有細，細的?5已經有交易，就算特大的都只賣?10。有團友同我講，早前喺香港買較大的水仙頭，都要成二十蚊一個，即使到最近跌價都要十幾蚊，咁抵難怪有團友一口氣買了半打！
聽經驗豐富的團友同領隊講，要揀靚水仙頭，一定要睇佢嘅外形靚唔靚，除咗要夠肥，重要愈多菖愈好，多花的機會就愈高，睇見佢哋個個踎低係咁揀，睇嚟呢度嘅水仙頭質素都不俗。
臘肉廠是另一個最受團友歡迎的購物點，經過個多鐘車程終於由深圳去到東莞這間大型臘肉廠，廠內有專人講解製造臘腸的程序，講解雖然沉悶，但當他打開用來存放風乾臘腸的大型鐵櫃，在場每個人見到咁多臘腸都嘩然，令人大開眼界。除咗臘腸，面對一條條半肥瘦的臘肉，每個團友同樣感到興趣，有團友更落手逐條揀，實行揀條最靚嘅返香港，每包?21。
臘腸廠負責人話，東莞臘腸的特點係又肥又短，每條分開幾截，望落比普通臘腸肥美，但我發現原來臘腸都有兩種價錢，負責人話?25的一種是用冷藏豬肉製成，而?38的一種則用新鮮豬肉製成，所以價錢都差一截，購買時記得要睇清楚！
Maggie：「我頭先試過啲東莞臘腸，味道唔錯，又比香港平。就嚟過年，所以我都買咗包東莞臘腸、膶腸同臘肉畀媽咪，三包加埋?77，算抵！」
午餐喺一間有五星級裝修的著名菜館食杭州菜，幾十蚊團費都可以咁豪，絕對令人驚喜。酒樓裝修金碧輝煌，周圍掛滿水晶燈、金色雕塑和歐洲仿古油畫，淨係食裝修都夠晒數。
杭州風味宴有八菜一湯，但菜式味道就偏向清淡，未必人人鍾意食。我就最欣賞其中的香酥鴨和四季豆，尤其是香酥鴨，鴨肉香口得嚟又嫩滑，菜式雖然唔係大魚大肉，但味道不俗！
團名：購買年貨逍遙遊
團號：L/N352400
行程：到全國超級連鎖商場萬佳百貨選購年貨、花卉世界選購年花和水仙花頭、香記蛋卷肉乾城、午餐於金色四湖大酒樓享用杭州菜、參觀鹿兒莊、參觀東莞老字號臘味廠。
團費：$38（大小同價）
小費：導遊、司機小費合共$40
集合及解散地點：深圳羅湖口岸餐廳門口
出發日期：即日起天天出發
查詢電話：27762774（匡域）
包團至抵之選
畀$8團費就可以去勻幾個購物點選購年貨，重要包埋午餐，但此種團只供包團，報名人數起碼要十位以上，不接受散客，最啱就係一家大細同朋友或者組團辦年貨，每個人加埋小費都係幾十蚊，絕對是抵玩之選。
團名：$8年貨團
行程：茗香閣、祈福堂、香記、城市廣場、萬佳百貨、三島中心。
團費：$8
小費：導遊司機領隊每天$45（需於報名時一併繳交）
集合及解散地點：羅湖
出發日期：即日起
查詢電話：22007944（四海）
中山年貨團
若嫌去深圳辦年貨未夠特別同新鮮，可以考慮呢個中山一日遊，價錢雖然貴啲，但勝在購物點有特色，行程有全國最大的美式連鎖超市，中山菇蘇別館，貨品種類多選擇多，是另類年貨團之選。
團名：中山一天團
團號：BCC01-SPC
行程：中山菇蘇別館、深圳花卉世界、沃爾瑪購物商場等。
團費：$118（包小費）
集合及解散地點：香港
出發日期：1月16、19、21、23、26日
查詢電話：21088888（康泰）