經紀陳噚日同小初講，雖然呢排紅籌國企當炒，但好多股份已經升咗唔少，都係玩優質工業股較着數，尤其係小型工業股，皆因班芬佬特別鍾情呢類股份。
其中龍記集團（255）可以優先留意，雖然隻股以往波幅頗大，但聽聞公司近排生意十分好，兼且過往有派息紀錄，最合芬佬口味，所以有機會成為「明日之星」。
龍記早前公布中期業績，盈利上升40％，賺成6026萬元，重派中期息0.05元。此外，公司又同時公布，將財政年度結算日，由3月底改為12月底，即係大約4月底前，就會公布截至去年底9個月業績。
經紀陳話，龍記生意好，主要係受惠內地市場需求，由於外資同大陸廠家不斷投入資金興建新廠，令到龍記嘅模胚生意亦受惠。雖然隻股現階段仍見到唔少投機盤炒上落，但只要公司業績出色，就唔怕芬佬唔心郁，一旦買盤湧到，到時股價就會大升。
慕容小初