施政報告一出，財赤、加稅聲音又再現，又是勒緊褲帶的時候！不過好在香港人適應力強，小市民再次發揮慳家精神，用12蚊一樣可以有大把美食，三位試食兵團帶你去黃埔一次過食盡佢！
記者：陳冰麗
攝影：伍慶泉
Model：Ivy、Giniki、Steven
估不到一向高消費的黃埔區，原來隱藏着很多便宜又美味的特色食物，用12蚊一餐一樣可以食日本料理，日式拉麵、日式鰻魚飯，甚至日式鮑魚小食等。
試食兵團Ivy：
以12蚊嘅價錢嚟講，拉麵已超乎水準，我覺得麵條夠彈牙，配料夠多，食晒一碗已經飽晒！
幾款食品的質素不錯，全部由日本進口的拉麵，款式夠晒多：九州拉麵、豬扒拉麵、龍蝦丸拉麵、牛肉拉麵、雞扒拉麵、辣肉拉麵等等。其中推介九州拉麵同龍蝦丸拉麵，份量夠飽肚之餘，配料又足夠，豬骨湯底尚算不錯。
至於蒲燒鰻魚飯更是最人氣之選，鰻魚肉身不薄，醬汁味道同市面一樣，香氣逼人。連試食兵團都忍不住整碗幹掉，Ivy話：
「估唔到12蚊都有質素唔錯嘅鰻魚飯食。」
為何能做到如此低價錢又高質素的食物？原來是一招拋磚引玉，負責人May話：
「因為剛開舖，未必好多人識嚟，所以全場所有食品由家陣至三月底都一律價$12。」
阿May話呢招薄利多銷策略果然見效，呢兩個星期湯麵經常供不應求。
龍蝦丸拉麵（上）$12
九州拉麵（下）$12
拉麵全用上豬骨湯，由日本進口的龍蝦丸，爽口彈牙，口感佳。另一款好地道的九州拉麵，無論配料：叉燒、粟米、海帶、蛋，及食法都跟日本同出一轍。
試食兵團Giniki：
麵好彈牙，唔似係本地貨，豬骨湯底雖然唔係完全奶白色，但都好鮮甜，飲得出有豬骨味。
蒲燒鰻魚飯$12
高級日本料理食到的鰻魚飯，閒閒哋過四、五十蚊一碗，這裏只係$12，抵食非常，而且並沒有將價就貨，質素都不俗，鰻魚燒得夠香，甜甜的燒汁又惹味，配合得宜。
試食兵團Steven：
啲飯軟硬適中，連同一大嚿鰻魚，配以蒲燒汁，好有日式風味，$12算物有所值。
美食軒日本料理
地址：黃埔家居庭地庫
電話：23340448
營業時間：7:30am-9:00pm
付款方法：只收現金
食完日式料理，梗係要食番本地嘢，點心絕對是香港的代表之一，$12都可以食到即叫即蒸腸粉，而且更是新創口味南瓜腸粉同玉子豆腐腸粉。
條條腸粉晶瑩剔透，可以看到入面包的餡料，三位試食兵團亦覺得吸引，紛紛搶試其中兩種新口味腸粉……一致判決玉子豆腐最正，口感最佳；至於南瓜無論皮同餡都是軟身，口感稍削，Giniki認為：
「玉子豆腐重加有生菜絲，外滑內爽，重無咁膩。南瓜腸粉則甜甜哋，而且餡又起沙，同滑滑腸粉都幾配襯，但稍嫌食多幾件會滯。」
玉子豆腐腸粉$12
腸粉內有玉子豆腐、生菜絲，配搭新穎。腸粉及得上玉子豆腐的滑，配以帶爽口的生菜，帶有雙重口感。
南瓜腸粉$12
賣相不俗的一款南瓜腸粉。南瓜肉經蒸熟後再壓成茸，用作做餡，原味十足，配以滑嘟嘟腸粉，幾乎唔使𡁻即可吞入喉嚨。
試食兵團Steven：
南瓜腸粉好特別，第一次試，腸粉真係好滑，夾雜蒸腍帶少少甜味嘅南瓜肉，感覺好新鮮。
老香港
地址：黃埔花園第八期蔡瀾美食坊101號舖
電話：31522305
營業時間：11:00am-11:00pm
付款方法：只收現金
要發揮慳家精神，一樣可以入高級食府，只要你識慳一樣有平靚正嘢食。外表豪裝的辣蟹坊，入去不一定要食蟹，查實這裏的$12香煎蘿蔔糕實在做得不錯，三位試食兵團即使食到飽亦被蘿蔔糕香味攻破，紛紛起筷搶食。
這裏的蘿蔔糕香味十足，配料有臘腸粒、臘肉粒、冬菇粒等材料，師傅又煎得夠甘香，外脆內軟。三位試食兵團之中，兩位女士後勁凌厲，愈食愈勇，反而男團員Steven不敵，舉手投降。Steven話：
「太飽食唔落，試食咗一細嚿，覺得味道稍為鹹咗啲，配料幾多，同市面一般比較起嚟都有水準。」
香煎蘿蔔糕（上）$12
蘿蔔糕配料多多，煎得夠香脆，配以奉送的辣甜醬食，正正。這裏的大菜糕勝在不太甜，女士尤其會喜歡，爽滑好有口感。
大菜糕（下）$12
試食兵團Giniki：
我比較鍾意呢款大菜糕，本身唔鍾意食太甜嘅甜品，呢度嘅大菜糕甜度適中，重好爽滑，口感唔錯。
辣蟹坊
地址：黃埔花園第八期蔡瀾美食坊115號舖
電話：28329862
營業時間：11:30am-11:30pm
付款方法：現金或信用卡