中資熱錢持續流入，好似要為特首施政報告打氣，港股噚日升112點，收報9834，成交增至73.07億元。
港股仍以中國概念股炒味最濃，油價雖回軟，但中石油（857）及中石化（386）仍分別上升0.63%及4.2%。不過，中資入市亦未能減輕投資者憂慮，噚日美資大行所羅門美邦發表報告，憂慮港府公信力下降，可能會增加在港投資風險。過往外資只擔心中央干預香港事務所帶來嘅政治風險，但今次嘅憂慮竟直指和特區政府有關，唔通阿董變埋鬼見愁？
電盈（008）噚日借勢開車，股價大升5.3%，收報6.95元。電盈後市估計朝1美元（7.80港元）目標進發，電盈併股目的都係想股價重上1美元以上水平，方便基金吸納，如果達唔到呢個目的，電盈可能要再搞股份2合1。不過，黑客另有睇法，佢話電盈噚日急升，主要因為中資熱錢輪流炒，至於升勢可以維持幾耐，就真係好難講。近日中國外滙管理局話要嚴打違規外滙交易，防止資金外流，似乎係對流入炒港股嘅中資熱錢發出警告，投資者宜見好即收。
立信工業（641）雖遭大股東減持4000萬股，但股價依然堅挺，反映接貨者並非弱者。不過大股東沽貨價2.20元，以噚日收市價2.55元計，接貨者帳面已賺16%，短線投機已夠水位獲利。Cookie則話，此股成交稀疏，要出貨並唔容易，起碼都要炒上3元過外，至有機會散多啲貨。
華燊燃氣（8035）獲高盛垂青後，股價兩日累積升幅14%，噚日收1.03元。據聞大戶今次入市成本約0.90元，大戶炒細價股，通常唔止十零廿個巴仙利潤，以高盛目標價1.26元計，尚有22%上升空間。
阿虎