威靈頓街巧遇「名店Q」，冇見兩個月，已由中環名店Senior店長晉升為執行助理總店長。無他，因為好多名店進行年輕大改革，「名店Q」只得二十五、六歲，正係適合人選。佢話公司今年生意唔錯，每個月都有花紅分，唔少打工仔聽到後流晒口水，當然全靠佢催谷生意有功。
不過「名店Q」話今時今日做中環名店冇以前咁有型，以前店內只招呼城中名流，𠵱家變成招呼內地「大腕」（內地對有錢有面人之稱呼）。剛過去嘅聖誕，「名店Q」話全靠內地客撐場，人人手持大量現鈔，收銀數錢數到手指爆坼。
做內地客其實冇問題呀，識講普通話就乜都解決晒，但「名店Q」聽到後話：「你有所不知，招呼內地客要用第二套，例如佢哋試褲唔會去試身室，鍾意就地正法，當住大庭廣眾就咁笠條褲上腳，然後左照右照。以前遇上類似情況，我哋一定黑面對待，𠵱家點敢出聲，重要推埋塊鏡方便佢哋，難得佢歡喜，隨時一個款每個色執一條，十足以前香港暴發戶。有一次重誇張，成班典型『大腕』入到嚟，竟然一聲唔出就坐喺我哋舖內Display度等人。𠵱家我每日咪好似返深圳做名店Sales，邊似以前咁有型啫。」
主持人：大食Jack
八卦熱報：