蘋果體育班名家公認西甲波好睇，但係我求大俠要提醒大家，係皇馬同華倫啲波特別醒神，另一支傳統強隊巴塞就係咁先。
前晚睇咗馬拉加對巴塞，點知睇到火滾。因先前連續兩場大勝嘅巴塞都踢到不知所謂。雖然佢哋受傷兵困擾，但話晒佢哋喺西班牙咁出名，結果嗰個教練雲高爾就亂用人同亂排陣，有列基美同沙維奧拿唔用，搞到班波冇晒隊型，全場同馬拉加水鬥水！
我求大俠認為巴塞已經見晒底，雲高爾真係冇晒計，根本冇資格同皇馬及華倫相比。
講開又講，今屆有個「隆」字音嘅球隊都唔多掂，打CBA嘅香港飛龍就已經十一連敗；NBA嘅速龍最近贏番場，但之前輸足十二場，唔通這個音真係咁唔「老利」？
「收費台」雖然攞咗本屆英格蘭足總盃嘅播映權，但呢個禮拜嘅重賽就冇話有直播，睇嚟球迷都係叠埋心水早啲瞓。不過，其實新特蘭對保頓嘅重賽都有啲睇頭，而且新特蘭重喺賽前傳出打開龍門嘅馬曹不滿蘇連遜傷愈後即刻有得踢嘅消息，我求大俠就唔明「收費台」點解唔考慮播呢場波喇。
列斯由季初開始已經話要大清洗，不過暫時都只係賣出咗達葛治同埋保耶，衰在呢兩個「散兵」同新球會上陣，都唔能夠贏波，腳頭似乎麻麻，令人懷疑佢哋嘅作用同埋實力。𠵱家斟緊科拿嘅曼城，都唔知會唔會受影響而轉軚，如果係嘅話，想散貨嘅列斯就真係喊都無謂。
塞內加爾雖然喺世界盃表現一鳴驚人，但今屆到英超聯效力嘅塞內加爾國腳就似乎表現麻麻，利物浦嘅迪奧夫同戴奧早已經俾人彈，伯明翰嘅A施斯勉強算對辦，但啱啱加盟嘅高利喺前日對阿仙奴場波睇，就好唔掂，重未攞到比賽節奏又冇位置感，而且同隊友有言語溝通困難，搵佢嚟嘜亨利，真係盞搞。
曾幾何時，意甲聯被喻為全世界最富有嘅聯賽，球星多、球會錢多、球迷多、爭住播佢哋比賽嘅電視台重多，恨死英格蘭球會。不過，風水輪流轉，𠵱家意甲球會多財困，重冇乜電視台問津，搞到英國嘅Eurosport同意甲聯簽約，喺二月開始播意甲聯呢單嘢，俾當地視為天大喜訊㖭！