天寒地凍匿在被窩中看影碟，將最近可以睇嘅新戲都睇晒，開始向經典名片進軍。邵氏老闆都算忍得手，旗下電影除了當日在戲院中面世外，從未在其他媒介出現過。很多年輕戲癡對這批瑰寶只聞其名，未觀其片，今勻經數碼重新處理後以DVD重生，可以睇餐飽。
仔時在戲院看過《星際鈍胎》，記憶中看得非常過癮，今番重睇，有更多發現。伊雷先生是一名一流喜劇演員，當日只覺他惹笑，今日方發覺原來都好靚仔。鍾楚紅小姐靚絕人寰，當年當日更是芳華正茂，靚得嚟膽拖幾分儍戇氣、無知味，好似好易呃，開正男性觀眾口味，一場仿瑪莉蓮夢露的街頭被吹起裙戲，雖然已經係慢鏡頭，但實在係好多嘢睇，揸住個遙控係咁㩒倒後掣，㩒到出煙咁滯。片種是港產片中罕見的科幻片，用上了大量模型拍攝，今日看當然不覺希奇，但在當日已是令人喜出望外。再看看幕後人員名單，發現不少熟悉名字，章國明先生編劇導演、蔡瀾先生負責特技（？）、陳嘉上先生主理特別道具。
另一齣推介的電影是張徹導演的《十三太保》，勝在夠人齊兼叠馬，最有趣的發現是原來年輕時姜大偉先生與周杰倫面貌竟有八、九分相似，同樣擁有一對殺父仇人眼，同樣地冷峻，但一綻開笑容便令雪人融化了。
相信在農曆年假期，除了拜年及賭錢外，便是躺在床上看經典，有排睇。