年近歲晚，大家會否替自己的安樂窩添置新家庭電器呢？KENWOOD及意大利品牌DeLonghi，由今日開始至本星期六，一連5日舉行一年一度嘅開倉清貨展銷，超過2,000多件家庭電器以特價發售；其中以榨汁機、抽濕機、電暖爐、電炸鍋及電焗爐等必然最搶手。由於數量有限，想買就要趁手，加上有大量新淨嘅陳列品更減至2折，真係要出動全屋上下去掃貨！
記者：梁煒健 攝影：周旭文
ImageFamily：Janey、Javier、Jillian
雖然充油式電暖爐較慢熱，耗電頗高，但確係冇咁危險。由意大利廠DeLonghi製造嘅31系列，熱力可分1500W至3000W，共4個型號。雖然電暖爐有分大細，大機自然原價較貴，但家陣統一售價，不論7、9及15葉嘅電暖爐，均售$200一個，絕對係啱晒時令嘅必掃貨。
原價：$590至$1,299
開倉價每款：$200（每款100個）
由意大利DeLonghi廠製造嘅暖風機，其實今次開倉有好多唔同類型嘅，有1000W亦有2000W以供選擇；款式差不多有15種，但每款則只有10多個。正如呢個型號DeLonghiPV-T暖風機，可坐地亦可掛牆，亦有自動衡溫裝置及時間掣，另有涼風及熱風選擇，既安全又夠暖。
型號：「DeLonghi」PV-T
原價：$300
開倉價：$120（少量）
外表幾似一個電炸鍋，其實佢係一個有預校時間、可保溫達8小時嘅多功能粥湯煲。可以煲湯煲粥兼煲飯自然會有自動衡溫時間掣，且又可調節火力，功能多不勝數。這個煲可煮到4至6個人份量，只賣$250，必定係搶手貨之一。
型號：「KENWOOD」MC-100
原價：$390
開倉價：$250（貨量100個）
經常室外四處跑嘅朋友，遇着大雨就最易令一雙鞋濕透、發霉發臭；這個時候，一部乾鞋機就十分適用。KENWOOD呢部乾鞋機十分好使好用，一來有120分鐘嘅時間控制；兼且有鞋類選擇，大人細路嘅鞋都適用。家陣半價，小記第一個帶頭到場搶貨，試吓呢部乾鞋機究竟掂唔掂！
型號：「KENWOOD」SD-100
原價：$398
開倉價：$200（貨量30個）
雖然呢類舊式焗爐一般家庭已少用，但因這類舊式小型焗爐，對焗麵包仍有一手，就是令其香脆更有麵包味。由KENWOOD出品嘅型號MO-200，可選擇上管或上下管加熱，且有5、10及15分鐘加熱程序，自用或買嚟作獎品一樣咁啱使。
型號：「KENWOOD」MO-200
原價：$300
開倉價：$100（貨量30個）
間間廠推出嘅電熨斗差不多一樣，大家均有蒸氣噴水、防黐底等功能，減價後都係約$100。不過，這個KENWOODST-672型號嘅電熨斗，會在過熱時可自動熄熨斗，不論橫放或直擺，若果7秒冇人理佢佢就會自動關掉，十分安全嘅設計。
型號：「KENWOOD」ST-672
原價：$250
開倉價：$100（少量）
KENWOODJE-225榨橙汁機，由於顏色夠搶，款式又時尚，係後生女至冧嘅一款，自己郁手榨橙汁時都醒神啲。
型號：「KENWOOD」JE-225
原價：$198
開倉價：$100（貨量50個）
凡在場內購物，不論任何價錢，均可以超值價$60換購呢個由Ariete出品嘅巨型攪拌機MOD-93乙部。由於數量有量，換完即止。
型號：「Ariete」MOD-93
原價：$250
超值價：$60（貨量300個）
除咗有上述產品發售外，重有好多家電非常之抵買，如放濕機、抽濕機、吸塵機、電炸窩及大中細嘅咖啡機呢處都有。值得留意嘅係，有好多巨型吸塵機發售，$200起有一部確係抵；另外有抽濕機由$4,000減到$2,600，品種確係多籮籮。但謹記臨行前要㩒定現金去入貨，否則只係得個睇字。
開倉資料
地址：荃灣橫龍街58號荃灣國際中心18樓A室
交通：從荃灣地鐵站B2出口往巴士總站，再乘搭巴士41M、41P等可前往；或在荔景地鐵站A1出口乘93號小巴可經橫龍街。到達橫龍街後，過馬路步行約3分鐘即到達荃灣國際中心。
日期：即日至1月18日（星期六）
時間：上午11:00至下午6:00
電話：34120120
註：只接受現金付款