有「橋王」之稱嘅強積金管理局行政總監許仕仁，計劃向外發展一事睇嚟遇到阻滯。原來積金局舊年十月，以底薪接近四百萬一年向外招聘行政總監一職，只係吸引到三十幾位應徵者，聽講佢哋嘅質素都未能合乎董事局嘅要求。
董事局就有意見認為，呢份工薪金偏低，好難吸引真正高質素嘅機構領導人嚟應徵。
八方打聽過，許仕仁𠵱家份人工，底薪連花紅津貼有成五百幾萬一年；積金局今次請人，年薪只得不足四百萬，但另加每年百分之二十嘅酬金。份工又要精通金融財經、又要識行政管理同埋危機應變，要求好高但人工又唔算高。而三十幾個求職者經過多輪篩選，篩剩四個人，但呢四個人都未完全符合董事局嘅要求。
份獵頭報告已經交咗畀財政司司長梁錦松，等佢拍板，相信好快就會有公布。如果重搞唔掂，財爺有機會安排個高級公務員借調、或者用署任形式，去填住老許個位。
不過，原定下月八日滿五十五歲前就離任嘅許仕仁，就冇得咁快走住，佢重要坐多兩個月，到三月底先至有望可以離開積金局。許生早排放新年假飛咗去日本聽音樂，唔知係咪已經叠埋心水，準備喺積金局行政總監間房「再坐一會」呢？
（圖）積金局行政總監許仕仁（右）早排去日本聽音樂，但佢要真正向外發展就起碼要等多兩個月。
傳真︰2623-9278
電郵︰