經常來往上海嘅朋友F，送左丁山一本○二年十一月出版嘅新書，作者葛雋，書名《大上海小心眼》，香港「經濟一週」出版。呢本小書幾輕鬆過癮，專講上海啲閒事，如「說三道四的上海人」、「外灘內外的生活」、「風俗風情百有禁忌」、「閒言閒語」等等共一百八十頁，其中一篇講「上海能否追上香港」，有精句噃：「只要中共一日在台上，上海的追趕就會變得遙遙無期。」另一篇「上海的生意人」，引述大作家余秋雨講上海人：「上海人的眼界遠遠超過闖勁，適應力遠遠超過開創力。有大家風度，卻沒有大將風範。有鳥瞰世界的視野，卻沒有縱橫世界的氣概。」上海人最叻做乜嘢呢？余秋雨話：「直到今天，即使是上海人中的佼佼者，最合適的崗位仍是某家跨國大企業的高級職員，而很難成為氣吞山河的第一總裁。」
各位去上海，俾人視為港燦，再睇吓南京路、淮海路繁華，開始有啲自卑感嘅話，不妨睇吓呢本《大上海小心眼》，為自己打打氣！
朋友F話：「上海人𠵱家已經唔再講阿拉幾年內追上香港，而係講阿拉要成為國際大都市，根本目光唔放在香港身上。所以香港人亦唔須有啲上海情意結，成日把香港與上海比較，驚佢追上嚟。當權派、普通人都應該抱着毛主席所講，超英趕美嘅心態至啱。」朋友F未嘗無理，可惜回歸後，香港政治日益中國化，二十三條更妨礙言論新聞自由，拖慢香港發展，如此下去，怕要追趕上海㖭。