【本報訊】「中六合彩唔見中，偏偏行中嗰個窿。」對於自己恍如電影《國產凌凌漆》周星馳戲中的發明「篋神」一樣，突然如一飛沖天般被炸起彈高一米多的陳峯來說，昨日簡直是最倒楣的日子。
天主教徒的他昨晨剛去完教堂，正信步往眾安街附近一間酒樓與妻子品茗，剛巧走至報檔前面，突聽到一聲「隆」然巨響，他當時「唔知發生乜嘢事，亦唔知喺邊度發生」；就在這個時刻，他清楚聽到一聲更大聲的巨響，「係好大聲好大聲，跟住就成個人彈起幾呎咁高，我都唔知發生乜嘢事，話咁快又撻番落地，兩隻腳跌落坑度，個身就跌落地。」他說着經過仍猶有餘悸：「如果當時行快兩步就唔會咁唔好彩啦。」
另一名首當其衝的傷者孫錦秋可說更幸運，「好彩爆炸彈起個渠蓋係向外，如果唔係，我都唔知有冇機會同你講嘢。」孫錦秋笑說：「買馬冇咁易中，呢樣就中到正。」
他形容當時正準備過馬路，突然前面「嘭」一聲巨響，個渠蓋就彈起，接着噴出成十幾呎高火燄，「好似原子彈咁，啲火高過成個人，自己跟住應聲倒地，隻腳重叉落個坑度，如果啲火係噴埋我嗰邊咁就大鑊。」留醫的孫錦秋說曾經在醫院睡覺休息，但爆炸的驚悸令他多次驚醒，根本無法入寢。
目睹孫錦秋受傷倒地的另一名傷者連永義說，他距離沙井約五呎，聽到地底傳出一聲爆炸聲，隨即衝出十幾呎高的火燄，他還來不及反應，已被火灼傷頭和面部，跟着一聲更響的爆炸，「見到個阿伯（孫錦秋）雙眼翻白跌落地」他說，整條街的路人爭相走避，狀甚混亂。
「今次咁好彩，真係要返屋企還神至得喎。」另一傷者張惠芬驚懼未了，形容她被噴出的火花燒傷都不知道，當時一聽到爆炸聲便只顧跑過馬路，想「有咁遠跑咁遠」，直至有店舖的店員告訴她頭髮燒焦和面部有點灼傷，那時才知道自己受傷。跟着又聽到另一更響的爆炸聲，自己已嚇至目瞪口呆，事後猶有餘悸。