007歐洲香港無處不在
荷爾芭莉維園派遊戲卡

皮雅斯布士南（PierceBrosnan）同荷爾芭莉（HalleBerry）主演嘅《新鐵金剛之不日殺機》，係占士邦系列嘅第二十集，宣傳攻勢一浪接一浪，世界各地包括英國、澳洲、法國同墨西哥嘅街頭都見到套戲嘅大型海報同廣告，荷蘭嗰邊重將套戲個logo擺喺溜冰場上面，真係有計。

又有老翻
香港呢邊亦唔輸蝕，我羅拉發現喺維園入口整咗個占士邦巴士站，站嗰度有個掃描器，當你放隻手埋去，就會彈張占士邦遊戲卡出嚟，都幾盞鬼。
雖然呢套喺三十號上畫嘅《不日殺機》用咗唔少人力物力宣傳，不過我羅拉就已聽聞有不法之徒將《不日殺機》嘅翻版DVD推出市面，呢隻碟喺深圳賣十蚊港紙，隻DVD嘅畫面雖然唔係太差，不過配上去嘅簡體字字幕就同啲對白唔多夾，肯定睇到啲觀眾一頭霧水。
另外，荷爾三月會同彭妮露古絲（PenelopeCruz）合作拍科幻片《Gothika》，佢喺入面會扮一個失憶嘅精神病醫生。