近期手機興乜色？用嚟冧女至啱嘅粉紅色就一定入選，最近連部影相手機GD88都出埋粉紅色，而GD55同GD68都有粉紅色，機身勁細嘅GD55當然啱晒女仔手形，但講到好玩當然唔及內置鏡頭玩影相嘅GD88，不過就要落重本，話晒部機要成五千幾蚊。
文：羅新基
行貨就重未有聲氣，不過就已經有水貨現身，但就唔係咁多舖頭都有貨返，早前就傳過喺銅鑼灣一帶嘅某間舖頭見過，標價成萬蚊，不過貴極都依然有人捧場，話咁快部機已經甩咗手。原來部P800喺歐洲部份地區經已正式開賣，所以有水貨到港一啲都唔奇，不過就係英文版。但點解今次唔係咁多舖頭肯入貨，據啲舖頭老細講，原來返貨都要成六千幾，起碼要賣七、八千先叫做有些少賺。咁又係，家陣邊有咁多人買得起，一個唔好彩賣唔出，大拿拿責住幾千蚊，真係諗唔過，行過先達啲咁旺場嘅地方都唔多覺。
NEC部N8000都差唔多賣咗成兩個禮拜，除了機內預設嗰幾款Wallpaper及鈴聲外，喺官方網頁Download個Software再加埋條Cable，就可以自行將相片或鈴聲經電腦過落部機度，身邊就有個N8000用家搵緊邊度有呢條Cable賣，原來喺NEC個維修中心已經有，每條$120，至於個Software就先喺NEC個網頁做登記，然後就可以免費Download到。