唔知係咪受雪糕佬調查造數事件影響，小初發覺近期好多炒家都唔敢掂新股，聽講有部份炒家就算一早應承咗人哋幫手新股圍飛，但最終亦甩底，搞到當事人頭都大埋，唔知點樣收科。
炒家唔玩新股，又有乜樣好做呢？據聞佢哋多數搵番自己最熟悉嘅公司炒作，特別係近年受基金追捧嘅工業股，只要間公司乾乾淨淨，盤數又見得人，就唔怕冇藉口炒起。
經紀陳話，好似做PVC布家用製品及PVC管材嘅世界集團（713），據聞因為有炒家崔護重來，股價重新振作，上周由0.25元水平，升至0.315元高位，上周五仍然企穩0.30元收市。
經紀陳又話，聽講上星期班炒家只係小試牛刀，重未散過貨，相信短期內隻股仍有上升空間，有興趣可以小注跟風，短炒一轉。
至於隻股炒作嘅理由，主要係盤數見得人，同埋炒主要市場美國經濟會好番，炒Recovery概念。
慕容小初