美股個勢穩陣，港股少咗層顧慮，恒指羊年來臨前有機會上到1萬大關，可採逢低買貨策略，唔揀股票Call輪買，可揀恒指Call輪。
恒指Call輪最熱門嘅係9552，3月28日夠鐘，現價17.4仙，溢價4.4%，槓桿率27.9倍。老實講，咁嘅溢價，代表恒指要升四百幾點，揸隻輪去到尾先至打和，唔算平，但勝在買賣非常方便，槓桿率又大，溢價唔會三朝兩日即時大縮，搵嚟短炒啱晒。要壽命較長嘅恒指Call輪，則選擇9668，年中到期，現價20.5仙，溢價4.1%，槓桿率13.6倍。
揀個別藍籌Call輪，近期提過嘅九倉9476非常抵買，6月中夠鐘，現價21.8仙，溢價只係1%，槓桿率7.3倍。九倉（004）如果弱勢或者睇淡，相關Call應該差啲，溢價應該低啲。但九倉個勢好靚，9476有機會彈升兩成。
和黃（013）近排每日高低波幅1元至1.50元，升上之後有沽壓，回落之後有支持，喺升跌之中，可以諗吓Call輪走短線，對象係9518，手法係升幅接近1成散水，跌幅接近1成則買入。正股唔易有大波幅，買賣正股易蝕使用，9518啱炒上炒落，留意時日唔係太多，下月下旬到期，溢價3%會慢慢縮細。
章盛