英倫球壇有唔少球員都有賭錢癮，而車路士前鋒古莊臣日前就自爆佢季初開始就一直沉迷賭錢，結果幾個月內就輸咗成五百萬港紙咁多！
原來古莊臣季初就曾經因為左膝傷一段時間無參加訓練，兼且老婆仔女已經離開英國返咗冰島，竟然開始墮落，喺賭場流連，重沉迷咗落去㖭，有一次佢曾經贏過成一百二十萬港紙，贏錢自然心雄，結果咪搞到𠵱家輸咗五百萬港紙，佢話星期二重要還埋六十萬港紙先至唔使再欠債。
不過，好彩古莊臣得到經理人同球會支持，先至唔使泥足深陷，而佢解釋今次自爆係因為想將自己經歷，警惕年輕人知道沉迷賭錢會有好嚴重後果。我求大俠覺得古莊臣今次勇於承認過錯行為值得一讚，起碼畀青少年知道沉迷賭錢嘅禍害，而且呢位冰島球員質素唔差，喺車路士應該仍有作為，如果因為賭錢而影響球員生涯就真係唔抵囉！
早前轉會費倫巴治失敗後，好耐無比賽嘅熱刺前鋒列布夫最近連精神都出現問題，佢經理人話如果熱刺唔畀佢落場，又唔畀佢走，真係唔知會發生咩事。我求大俠以前都有睇列布夫喺基輔時嘅比賽，都係一員猛將，如果熱刺因為畀咗成千萬鎊轉會費而覺得收唔番回報，最後搞到個球員變咗「儍強」，咁就真係過份咗啲喎！
係人都知大人蝦細路唔啱，新特蘭中場舒華斯就竟然因為座駕俾兩個細路用雪球掟中而發老脾，重出拳㖭，打到兩個細路一個腳踭骨裂，一個腹部輕微受傷。嘩！用雪球掟你㗎車就要打人，如果我求大俠唔覺意刮花你㗎車，咪要入醫院唞幾日？留番啲力練波重好過啦！
保耶上周六首次替韋斯咸上陣，但有部份主場球迷就嫌佢以前惡行多多，唔多歡迎佢，而球迷反應令到領隊羅達都好出奇，重話以為自己簽咗伊拉克總統薩達姆．侯賽因㖭，令主隊球迷有咁嘅反應。保耶以前打人，又喺球場蓄意踩人塊面，我求大俠覺得佢真係唔抵幫，除非改過自新。
男子網球員總會（ATP）噚日表示今年會增加場外同場內嘅藥檢次數，點知俄羅斯球手沙芬就極力反對，話禁藥問題喺網球壇一啲都唔嚴重，話新措施根本係多餘，重夠膽死話有啲球員見到針會頭暈。我求大俠一直好贊成體育要「淨化」，如果身冇屎就唔使咁多聲氣，唔通係「此地無銀」。沙芬！唔該收嗲啦！