對《魔戒》的原著小說冇乜認識，所以唔係太知個故事究竟想講啲乜，只知道《魔戒》的電影版已成為荷李活最新特技視覺效果的展示場，加上第二集比第一集更名利雙收，於是一開畫就仆去睇。敬告所有觀眾，入場前請先用十五分鐘回想第一集的劇情，再在戲院大堂睇吓劇照、點吓相、認認人，否則擔保入到戲院一嚿雲，睇咗成個鐘頭未知講乜。話說上集，大眼仔男主角為了要毀滅魔戒，踏上征途。路上不斷有不同單位埋堆，聚成了一幫人，可惜又被邪惡勢力所沖散，所以今集一開頭便東一忽、西一忽，講吓呢班人又講吓嗰班人，唔熟劇情就好易迷失。
上集非常搶鏡的灰袍老巫師本來已壯烈犧牲，但今集竟然可以好似《龍珠》卡通咁死後復生，重要加強咗功力，由灰袍升上白袍，我諗大約好似沙展升督察咁上下。
實在好似鬼佬版《蜀山》，不同門派的人有不同造型用不同武功持不同法寶，為天地正氣與邪惡周旋。如果徐克導演用同樣咁嘅預算，相信會拍得重好睇。上集露過面的那位四腳爬爬兼甩毛、面容有點像鄧寄塵先生、演繹有點像劉紹銘先生的怪人在今集大放異彩，其用電腦特技畫出來的演技入木三分，預言今屆將在奧斯卡的頒獎台上見到他的出現。《魔戒》好唔好睇見仁見智，但真係覺得唔使用三個鐘頭去講古仔，然而散場時又聲聲聽見觀眾們話抵睇，咁又係，同樣畀咁多錢，但係可以同女友坐足三個鐘，又確係抵。