有云忠忠直直終須乞食，莫非今時今日社會容不下一個老實人？在石澳經營泰國餐廳已有八年的玻哥，早年當公務員，退休後投身飲食業，門外漢受騙且幹過無數戇居事，不過仍然堅持做個「戇居佬」，只是不再輕易信任人，直到他遇上一個「老實人」。
記者：邵超 攝影：黃子偉
93年港英政府解散警隊政治部，英文不佳的玻哥不敢接受居英權，怕在彼邦變成又聾又啞又盲的人，最後義氣幫朋友，入股合作，一年後因為經營不善便結束了，連帶婚姻、友情也在這年失去。
「94年生意失敗，又先後借咗差唔多廿萬畀朋友，一去無回頭，退休金幾乎無晒，以前為朋友多過為屋企，搞到嗰年老婆跟我離婚，當時可以話係一無所有。」
玻哥孤家寡人，加上當年走茶餐廳路線的「石澳樂園」，生意一直不佳。但玻哥偶然認識一名泰國人，經他提點，改為賣越、泰、東南亞食品，生意立時有起色。
「當時認識一班泰國好廚師，每晚都有人排隊等位，可惜佢哋簽證到期要返泰國，後嚟嘅師傅出品，食客覺得唔好味，連續九個月生意一落千丈，加埋911，以前賺到啲都打個和。」
每月虧損數萬元，別的老闆早就減薪裁員保本，玻哥卻從不拖欠工人薪金，寧願到提款機現金透支。心灰意冷之際到西貢散心，重遇前大廚的師兄阿實，剛巧阿實有意返泰國開餐館，玻哥便游說與阿實一同合作。
玻哥叫阿實做高佬實，正宗寡言靦覥的老實人模樣，整天躲在廚房裏默默耕耘，少說話故廣東話不流利，驚失禮街坊，訪問全賴太太阿愛發言，玻哥爆料：
「阿實對住太太都係咁怕醜。元旦阿愛生日，叫佢哋拍一張握手切蛋糕嘅相，阿實都怕醜唔肯……佢做事好認真，好多員工夠鐘就收工，但佢就做到無客入舖頭為止，佢唔收工徒弟都唔敢走。」
「記得阿實第一次捧咖喱蟹出樓面，聞到係以前嘅香味，我知道一定掂，熟客都大讚有番以前嘅水準。十二月初阿實嚟咗之後，每日單係午市已經多咗千幾蚊生意，開始有能力逐步還債，月尾埋單大家都有幾千蚊分，我覺得自己好似中咗六合彩。」
老實是一種福氣，幸運之神不會遠離老實人太久，他們的夥伴關係足以度過石澳冬季慣常的淡季，總算可過一個肥年，玻哥亦老懷安慰。
蛋網藏鮑片
這個實為開胃前菜，蛋網裏是蝦和罐頭鮑魚片，加入味道濃烈的香茅，令人精神為之一振。
蝦膠釀製更彈牙
糯米釀雞翼吃得多，換上蝦膠感覺沒有那麼油膩飽肚，蝦膠蝦肉多過粉，所以特別彈牙，很快便幹掉整碟。
廣州得獎菜
阿實弟弟於01年廣州得獎菜，阿實從弟弟處學來，玻哥堅持蟹用生猛台山頂角膏蟹，貪其多膏肉實，成本貴些都要用。香酥餅有齊蒜香、牛油味重。
鑊仔上枱香勝於辣
阿實得意之作，花螺以鑊仔上較放碟上吸引，用辣椒膏炒花螺則香味勝於辣味，不怕燙麻了的味蕾吃不到花螺的鮮甜。
石澳樂園
地址：石澳786號
電話：28094165