皮包骨女星早排失戀後，就成日四圍shopping嚟發洩。話說早排皮包骨喺名店度買嘢，佢嗰日好開心咁揀咗九萬幾蚊嘢，點知碌卡嗰陣，竟然碌唔到，於是佢就同個售貨員講話第二日叫人落去畀錢，然後就想攞啲嘢走。
雖然皮包骨喺香港好多人識，但未畀錢就攞嘢走，點知你第二日認唔認數㗎？個售貨員只係打工仔，九萬幾要人填數咪好大鑊？於是個售貨員惟有同皮包骨話佢想買嘅一條鏈有人落咗訂，但佢就諗唔到皮包骨唔忿氣，係都要攞嘢走。
皮包骨重好惡咁，學劉德華口脗話要投訴個售貨員服務態度唔好，售貨員費事咁多事，惟有畀皮包骨攞走條鏈，好彩最後佢都找番條數。
其實皮包骨因為緋聞搞到形象差晒，工作量驟減，好易坐食山崩，之但係佢買嘢又狼，幾十萬鑽石，幾萬蚊條裙買到眼都唔眨，卒之碌爆咗幾張卡，周轉唔到冇錢還，真係慘情。
九人女子組合Cookies噚日喺粉嶺出席嘉年華會。早排Theresa大爆成員入面有人妒忌隊長Stephy，不過噚日佢就否認咁話：「我諗係我表達有問題，我哋冇人妒忌Stephy，我同佢識得最耐，佢都信我唔會咁講。」之後Theresa同Stephy重搭晒膊頭影合照。而另一成員Serena近日被指當街𠝹仔，佢話：「佢只係我男性朋友中嘅普通朋友。」
譚詠麟同莎莉一齊已經係公開嘅秘密，但佢一直冇承認莎莉嘅身份，早前佢接受車淑梅《舊日的足跡》嘅錄音訪問時，終於肯定了莎莉嘅地位。喺訪問裏面，車淑梅問譚校長嘅太太莎莉係唔係好支持佢時，譚校長直認不諱話：「當然啦。」譚校長重話莎莉每逢佢有大騷先會出現，又自爆以前演唱會嘅服裝，多數由莎莉設計咁話。
成龍噚日出席大嶼山竹篙灣迪士尼樂園嘅動土儀式。雖然佢係旅遊大使，要做埋點睛儀式，不過佢喺台上一分鐘都唔夠就俾人請咗落台，重一句嘢都冇得講，而且動土儀式又冇佢份，好彩最尾成龍都有得上台同嘉賓揮手講再見，算係攞番個尾彩咁啦！
台灣電影市道低沉咗好多年，近年冇乜製作，搞到金馬獎好似為港產片同內地片而設咁，所以台灣有啲人由上年開始嘈政府，話唔應該再撥款支持搞金馬獎，台新聞局原本向政府提出撥款千五萬新台幣（約三百三十九萬港元）辦金馬獎。但早兩日喺立法院俾台聯黨立委提案要取消撥款，𠵱家已經二讀通過，睇嚟好快可以三讀通過。而金馬獎大會已準備喺民間搵贊助商，繼續搞落去。
沈殿霞同女兒欣宜、關菊英、葉振棠等，前晚喺灣仔演出舞台劇《麗花皇宮2003》，今次係欣宜嘅尾場演出，噚日佢已離港返加拿大。
欣宜前晚演出時支咪曾失靈，好彩肥姐曾教過佢執生技巧，所以十分鎮定。欣宜話：「好彩媽咪教過我執生，爹哋（鄭少秋）因為忙搬屋，所以唔得閒嚟睇我嘅尾場騷。」而係演出後欣宜在後台同長輩話別時重哭起上嚟，要肥姐遞紙巾。
