阿仙奴作客伯明翰呢場英超，係禮拜日直播賽事之中最矚目嘅戲碼，因為伯明翰喺轉會市場重開之後，一口氣簽咗四個球員，其中包括為法國奪得九八年世界盃嘅前鋒杜加里。
阿仙奴領隊雲格就喺賽前大讚杜加里：「以杜加里咁嘅人才，我畀足一百分佢，佢有頭槌、有腳法，撞得衝得，簡直係為英超聯而設！」雖然係人都聽得出雲格出口術，但杜加里就好受落，重讚自己似簡東拿或者真路拿，係出眾嘅球員。我求大俠真係驚杜加里喺今日場波重係飄飄然到離晒地，踢到不知所謂，咁伯明翰就危矣！
要講呢場波嘅得意嘢，真係多到講唔晒，英國《太陽報》重連皮利斯幫韋拉起咗「大香腸」呢個花名都刮埋出嚟。點解叫「大香腸」，咪因為佢夠男士雄風囉！報道重話韋拉同維拉前鋒杜布連及狼隊龍門奧基斯齊名，係英球壇「三巨」！
有啲足球消息唔到臨場都唔知，好似噚晚布雷西亞對拉素場意甲波，賽前至傳出拉素正式發欠薪畀球員；另外布雷西亞前鋒巴治奧又陣前拉傷肌肉，呢啲消息會左右波友嘅扑槌決定。讀友除咗睇我哋文字傳媒攞料外，可以嘅話都要留意一吓其他媒體嘅資訊當補充。
祖雲達斯會方同教練納比唔滿意啲記者亂寫佢哋，玩新聞封鎖，只逢禮拜二同喺聯賽開記者會。雖然啲記者日前抗議，但祖記一於少理。球迷如果想知佢哋嘅最新消息，要靠晒佢哋個官方網頁。萬一個官方網頁唔放料，真係冇人知邊個出邊個唔出，叫人點估佢哋啲波呀！
科木因球迷搞事，搞到佢哋未來四場主場聯賽，要喺其他球場進行。今日佢哋對阿特蘭大場聯賽，比賽地點就改咗喺里賈納嘅格蘭尼路球場。如果佢哋畀阿特蘭大搞掂，剩低嗰三場喺中立場硬撼羅馬、帕爾馬同祖記，唔使問一定捧佢哋對家。
噚日我求驗客晨早十點起身諗住睇番場NBA直播，點知電視台因為衞星訊號問題，由直播爵士對熱火，改為轉播小馬對塞爾特人。本應站在球迷角度，有得睇奴域斯基、皮雅斯等當打球星，總好過睇馬龍、史托頓等老將，不過場波九點開波，球迷早早上網查到小馬第三節領先成二十幾分，上盤穩開，又邊有心機睇落去。
「卡達復出」搞到冇盤開
噚日有傳NBA速龍主將卡達對網隊時復出，搞到賭波公司唔敢開盤，結果係流料，卡達重要唞三周；其實唔開盤都係賭波公司明哲保身嘅好方法，事關計埋呢場畀網隊大炒，速龍已經連輸十二場，盤路就輸七個贏四個，長捧速龍對家就笑呵呵。