安仔和歐倩怡拍拖將近四年，同居生活亦過了好一段日子，他說兩人的感情穩定得很，縱使四年來常有吵架，但這一刻，安仔會視Cindy是陪他共度下半生的伴侶。
安仔揚言每次拍劇都會戀上對手，他說：「藝人係用感情嚟工作，但要識得點放點收，戲中扮情侶、扮兩公婆，我一定要畀對手鍾意我，我拍每一套戲都會愛上對手，但只限拍劇嗰兩個月，然後我要喺一個禮拜之內，盡快搵番自己嘅屋企人、朋友同女朋友。戲入面嘅世界係虛擬，其實都危險㗎，戲中你會結識到心儀嘅人，但你鍾意嘅只係角色，哈哈，危情七日呀，但咁耐以嚟，我未試過抽離唔到角色。」
安仔說，他跟Cindy拍拖以來，沒有出現過任何危機，因為他們有維繫關係的好方法，他說：「我哋大家都畀對方好大自由，大家亦有自己嘅空間，我哋係相敬如賓。
「不過，暫時我冇諗過會結婚，我覺得最緊要係兩個人生活嘅時候開唔開心，兩個人係咪一齊共同成長都好緊要，冇理由我喺度跑步，你喺度散步㗎，我諗我會到想有小朋友嗰陣，就會考慮結婚，喺呢一刻，我亦認定佢會係我下半生嘅伴侶。」