金匡副主席章桂新前日燒炭自殺，其好友羅兆輝稱曾勸喻對方不要投資內地生意。羅兆輝表示正在搞電腦軟件生意，又聲稱自己人緣很好，指自己若有困難，很多朋友都想幫他，不過要排隊，但他會先找城中富豪劉鑾雄和鄭裕彤幫忙。
羅兆輝的沙煲兄弟章桂新（Roger）前日燒炭自殺，幸好被及時發現送院，Roger在醫院表示除了妻子外，不想見任何人。羅兆輝昨日接受本報專訪時表示，他前日由澳門回港傾生意，但未能聯絡上Roger，並稱曾勸對方不要投資內地生意，惜Roger不聽勸告。羅兆輝繼而滔滔地談其近況。
羅兆輝說：「我𠵱家去到邊都有人識，內地都識，起碼深圳識，都習慣晒，感覺好無奈。試過有人搵我簽名㖭，我梗係冇簽啦，黐線㗎咩！我𠵱家領略到，做人平凡最重要，不過平凡都要生活㗎。我搞緊電腦軟件，講出嚟嚇都嚇死你，一定技驚四座，比我以前所做嘅都勁揪，以前我只不過係一個炒家嚟啫。」
問羅兆輝可會公布所做的生意？羅兆輝說：「唔公布都唔得啦，遲啲要上巿嘅嘛。我學識咗一樣嘢，吹牛唔緊要，最緊要知道底線喺邊，唔好吹到自己都信埋。我九七年時就試過啦，以為自己一定搞得掂，乜都唔驚，但地產巿道跌七、八成，呢啲係我知識範圍以外嘅嘢。我以前買垃圾股賺過好多錢，但呢啲冇用，遊戲係唔會完嘅，好似跑馬咁，只係啱啱出閘，都未入直路、未轉彎。」
那羅兆輝在生意上有何拍檔？他說：「同得我做拍檔，當然唔係凡人啦。」問羅兆輝和向來對他有情有義的城中富豪劉鑾雄可有聯絡，他說：「有，大哥（劉鑾雄）對我好好，如果我需要幫忙，佢隨時都喺度，但𠵱家冇咁嘅需要，大把人幫我啦，之前有人話幫我，我同佢講：『你排隊都有排排。』如果我要搵人幫，唔搵大哥、唔搵彤叔（鄭裕彤）先都講唔通啦。我人緣真係好好㗎，我覺得自己係全香港最好人緣嘅人，咁呢啲係我自己覺得，可能唔啱㗎！」
羅兆輝自動提起以前自己在前《東周刊》爆富豪和女星的性史，他說：「我好大量㗎，我曾經好嬲楊受成（前《東周刊》老闆），但都原諒咗佢啦。」
羅兆輝透露自己肥了許多，現時一百八十多磅，比去年在巴黎時胖了二十多磅，他說：「我化悲憤為食量呀嘛，成日食，一肚餓就食，減肥呢啲嘢隨緣啦！喺澳門最好㗎喇，想食乜就可以叫二十四小時roomservice。」
早前羅兆輝在澳門時，入住吳偉（街市偉）經營的酒店，並有報道指他在酒店的所有開支，都由街市偉支付，羅兆輝說：「你知唔知我點識佢？九七年時，我借咗四千萬畀佢，當時我重未識佢㗎！佢當時問我朋友借錢借唔到，我就借畀佢，我唔係個個都會借錢㗎，有啲人問我借四百蚊我都唔借，我同佢係有緣份嘅，佢話畀我喺佢間酒店住到死都得，總統套房喎，不過呢啲都係應該嘅！」
採訪：張止寒 攝影：娛樂突發組
