過咗新曆年之後，天氣好似無點暖過，雖然香港嘅冬天唔算好凍，大部份家庭都唔使開暖爐，但國內部份地區就喺過去一個月持續低溫，喺咁凍嘅環境下，暖爐就變咗必需品。
聽班行家話，有班大戶睇到呢個機會，走去問班芬佬點睇隻喺國內提供天然氣嘅華燊燃氣（8035），聽講佢哋今年盤數應該會好靚，結果兩幫人一拍即合。聞說呢隻股票會喺1.2元樓上批股，數量重係唔細，所以個消息喺上個禮拜中漏咗出嚟之後，股價同成交額都勁升。由於班大戶再搵多幾間大行幫佢哋吹風，睇怕隻股好快就可以升到個二樓上，如果今個禮拜初重喺1蚊水平，不妨執啲嚟玩吓。
上個禮拜五下晝，啲民企突然以特大成交上升，伏勝本住八卦嘅心理去問啲行家發生乜事，但似乎唔係好多人知道答案。聽一個行家講，話好似有大陸錢流落嚟香港，原因係有批喺香港上市嘅民企，話有機會攞到同北京奧運、上海博覽會有關嘅投資項目，不過嗰筆錢嘅「晒士」就唔係好清楚，伏勝相信呢筆錢喺農曆年前都唔會走住。
個行家重話，今次筆錢調落嚟香港，淨係會炒民企，各位炒家不妨留意番啲民企嘅走勢，不過喺歐亞（932）事件之後，伏勝對啲民企已經怕怕。除咗民企之外，大家重可以留意幾隻國企鋼鐵股，有消息指，為咗要落實未來幾年經濟增長可以維持喺7至8%之間，上方有指令要求將大部份奧運同博覽會嘅物料供應，都由自已友提供，到時幾隻鋼鐵股真係想窮都難。如果各位自問轉身走位夠快，可以吼吼呢批股份，話唔定可以搵番筆過肥年。
伏勝