八六年入行的郭晉安，最近因主演無綫喜劇《戇夫成龍》，重振聲威。但原來他自八八年憑電視劇《嬴單傳奇》竄紅後，等了十四年，到他谷肥二十磅長出一個大肚腩，剪了一個令他自覺沒臉見人的「椰殼頭」扮儍仔，才人氣反彈，現在安仔終可高呼：「我搵番吐氣揚眉嘅感覺啦！」
現年四十歲的郭晉安入行十六年，拍劇總數超過一千集。這位多產小生，八六年加入無綫，八八年在劇集《嬴單傳奇》中正式擔正，瞬間竄紅，惜人氣很快滑落。之後安仔雖然有機會做男主角，可惜星運平平。至九四年無綫播出他主演的《生死訟》，更慘成當年低收視劇集之一，由原本二十八集剪至十五集，事業陷入低潮。
事隔九年，安仔在《戇夫成龍》中扮演儍仔「丁常旺」令他人氣再次反彈，上周一早上，睡眼惺忪的他接了《戇》劇監製來電，得知《戇》劇的平均收視有三十四點（二百二十四萬觀眾），他竟嚇得跌落床。
安仔日前接受訪問時說：「我入TVB嗰陣，拍《城市故事》、《誓不低頭》，第三套劇拍《嬴單傳奇》就做男主角，嗰時梗係好開心啦，覺得吐氣揚眉㗎，但呢啲感覺已經離我好遠。到《戇夫成龍》呢套劇，畀我搵番呢種感覺，開心一定有，噚日我去柴灣食煲仔飯，隔籬枱一個阿媽用『阿旺』嘅腔調同個仔講：『你認唔認得佢呀？』『你知唔知佢係邊個呀？』聽到我猛咁喺度笑。」
安仔今次能夠一劇反彈，其實付出了不少努力，他為了扮演八歲智商的「阿旺」，立定決心在兩個月內暴飲暴食谷肥二十磅，胖得可以把肚腩放在枱上。他又剪了一個很土的椰殼頭，這都是他從未做過的。安仔直言確有不成功便成仁的感覺。
安仔說：「我拍咗千幾集電視劇，做嚟做去都係一個靚仔樣，以前我做感人嘅戲太多，我想嚟一個大轉變，所以監製當初搵我做呢套劇，要我增肥到豬頭咁，我毫不猶豫就接咗，我知呢次會係一個機會。
「不過，我有心理關口㗎，我肥咗二十磅，嗰日去髮型屋剪完個椰殼頭，出嚟嗰陣戴住頂帽周圍望，我同Cindy（女友歐倩怡）跟住去咗食魚蛋麵，我唔肯除低頂帽，唔敢睇自己個樣。Cindy同我講：『你個頭好好呀，冇乜嘢，好得意，我鍾意呀。』我講咗成十幾次『好驚呀』，點知佢話：『我鍾意咪得囉。』我聽完真係唔知好嬲定好笑。其實我重想整崩隻門牙拍㗎，但俾家姐阻止咗。」
這次安仔遇上事業上的第二個高潮，問他會否擔心只是曇花一現？安仔說：「我有啲擔心，不過我明白遇乜嘢機會都係命運安排。我會提醒自己做呢行會有起有跌，自己要好好行每一步，同埋識得感恩圖報，成功係要靠teamwork嘅。」
