行政會議前成員楊鐵樑昨為一批年輕人教授最後一課英語時概歎，本港英語水平近二十年來一直退步，「我英文都幾好，但都會錯啦，最緊要多啲講！」他鼓勵青少年多看英語節目及英文書，提高英語能力，保持本港國際城市地位。
青年協會邀請楊鐵樑向三十名青年人講解如何學習英語，為期十周課程昨日完結；楊鐵樑昨日坦言自卸下行政會議成員等職位後，退休生活十分平靜，希望繼續參與青年人活動：「同佢哋一齊，覺得後生咗！」
他說，近二十年來，本港英語甚至中文水平都有所退步，相信是因學校科目日益增加，學生未能專注學習語言：「呢個係世界性嘅問題，英國小朋友啲英文差咗，法國小朋友法文差咗！」但本港作為國際城市，英語水平必須提升。
他說「講、聽、讀、寫」四方面，本港較缺乏說英語的環境，學生應多看英語節目：「例如BBC、CNN，重有中央電視英文台，北京人英文好好！」他又推介五本英文書。
被問及日後會否再從政，楊鐵樑立即「擰頭」：「十幾年嚟都唔係政治人物，做行會都唔係好深入政治，當年選特首，都係因為冇人出嚟選！」特首董建華經常成為批評目標，被問及會否「慶幸」當年沒當上特首時，他輕輕帶過：「回歸後咁多事發生，特首工作好難㗎！」
至於會否寫自傳，他說：「寫自傳吃力不討好㗎，寫人哋俾人講，唔寫人哋又話點解唔寫佢，寫自己好嘢俾人話驕傲；寫衰嘢，又話你唔夠衰喎，哈！」他又說由於選特首時涉及不少敏感題目：「啲敏感嘢只係過咗幾年，咁快寫唔係咁好！」他又寄語港人，本港經濟「比上不足，比下有餘，都好過新加坡、台灣同韓國！」