去深井，必定要食燒鵝，講到老字號，裕記一定係首選，佢哋嘅燒鵝，由70年代初期賣到𠵱家！負責人華姐解釋，裕記前身只係深井橋下一間小舖，當中最撚手菜式，就係燒鵝！由於在70年代初，好多人都喜歡在假日時間，去深井附近釣魚同遊山玩水，而深井嘅燒鵝特別好味，就從呢啲釣魚客口中廣傳開去！呢度嘅燒鵝直到今日，仍然保持傳統炭爐燒烤，且幾十年都要持之以恒保持水準，就真係一啲都唔簡單！
裕記燒鵝飯店
地址：深井深康路9號
電話：24910105
呢頭講完裕記憑釣魚客嘅口而出名，附近勁舊嘅馬灣碼頭，當然係出名嘅魚竇，聽好多釣友講，呢度入夜好多時都有鱸魚同鱆魚出沒，而呢度重有一樣出名多，就係蟹！好多魚客都投訴啲蟹成日食佢哋啲魚餌搞到釣唔到魚，不過有啲人直情喺岸邊釣蟹，聽講大者，可以有6、7吋咁大㗎！
馬灣碼頭除咗係魚竇同蟹竇之外，佢兩邊嘅沙灘原來亦都係拍拖勝地。
好多情侶都好鍾意喺呢度對住青馬大橋睇日落，而且不時重見到有人喺度非法燒烤；觀景靚，嚟賞吓日落及月色的確無妨，不過清潔香港人人有責，嚟堆沙燒烤就唔多好啦！
喺正深井青山公路口有間海韻酒家，佢哋最耍家嘅係外省菜中嘅古法龍缸煨湯。呢度湯款足有十幾款，當中最出名係川貝津梨煨唐排、鮑魚人參煨老雞同沙參玉竹煨水鴨等，滋潤、滋補完全悉隨尊便。
海韻燒鵝海鮮酒家
地址：深井青山公路38號海韻花園地下商場
電話：24918183
A碧堤半島
B馬灣碼頭
C深井舊村
D裕記燒鵝飯店
E海韻燒鵝海鮮酒家
F嘉頓
G機場核心計劃展覽中心