失婚名媛除咗要照顧仔女外，自己又鍾意買嘢同扮靚，所以佢除咗落力做生意賺錢養家外，重不時四出應酬，識吓朋友。
失婚名媛早排咪自爆識咗個俊男嘅！不過因為佢太急進，成日約呢個俊男一齊去名店買嘢，又叫佢送車、送珠寶，結果交往咗一陣，就嚇走咗個俊男，因為俊男唔想做無底深潭嘅提款機，所以就痛定思痛，離開失婚名媛。
馮仁昭聽聞失婚名媛對嗰位俊男好鬼癡纏，有次佢約對方去珠寶店買嘢，失婚名媛好肉麻咁要俊男暱稱佢做「玫瑰」，唔知失婚名媛係怕俾人揭發佢嘅身份，抑或係因為受「玫瑰，玫瑰，我愛你」呢句歌詞影響呢？不過珠寶店裏面嘅人聽到俊男叫失婚名媛做「玫瑰」，就覺得好鬼骨痹囉。
黎淑賢噚日去咗尖沙嘴溫莎酒店，幫減肥產品嘅預展會做嘉賓主持，佢着咗條低胸長裙，非常養眼。
問黎淑賢着到咁性感，怕唔怕俾老公投訴？佢話：「我尊重個場合啫，而且間公司嘅老闆係我老公嘅朋友，重送咗好多減肥產品畀我。我𠵱家一百零五磅，重瘦過做女嗰陣。」
黎淑賢話新年唔知會唔會喺香港，要睇老闆成龍有冇嘢做喎。對於成龍早前話打算斥資二億起屋，重畀埋員工住，黎淑賢話：「係就好呀，我喺屋企包好晒嘢，隨時搬得。」
周周杰倫（Jay）上個禮拜四去咗新加坡，準備佢嘅個唱。阿Jay所到之處都吸引咗一大班fans，就算去麒麟大廈購物中心買沙灘褲，fans都貼身追蹤，務求要同偶像合照同攞簽名，所以阿Jay就好似開咗個小型簽名會咁。
荷李活女星安琪蓮娜祖莉（AngelinaJolie）噚日喺酒店出現，而佢主演嘅電影《盜墓者羅拉2》噚日喺中環一幢起緊嘅大廈取景，不過安琪蓮娜就冇到，只係有三個替身拍攝跳降落傘嘅場面。替身由八十幾樓跳落嚟，到咗五十幾樓就打開降落傘，最後就好準確咁喺巴士站度降落。
杜德偉（Alex）噚日喺金鐘置地廣場行街街，早前有報道話杜德偉同女友周汶錡感情不穩，重話佢女友忽然富貴，同上海富商約會。
問Alex知唔知呢件事？佢竟然話：「我知啲唔知啲啦，咁我對佢都好有信心。」至於早前Alex涉嫌藏有大麻，佢話呢個月二十九號會返警署協助調查。
吳文忻最近擔任中藥產品「東草堂」嘅代言人，噚日佢喺尖沙嘴出席記者會。吳文忻話試咗降脂排毒同調理身體兩隻產品，連屋企人都有得試用。
好快又到農曆新年，吳文忻已經計劃好同朋友去馬爾代夫旅行，所以今年佢返唔到美國探父母。
