左丁山以廣東話為文，有啲人鬧我教壞細路，破壞學生嘅白話文寫作能力，呢個罪名大到不敢當；任何人用廣東話寫文章，其實要有啲文言文根底先至寫得通俗易明，你哋睇吓珠珠嘅三及第文章就會領略㗎嘞。
自己好讀書，不求甚解，對一啲廣東俗語，其實識用識解而唔知源由，好似「唔理三七二十一，你要交咗稿先至准放假。」唔理三七二十一，究竟語出何典呢？最近有機會睇到一啲資料，略知一二。《小寶神功》作者劉天賜（賜官）解釋得好清楚。賜官讀哲學出身，師承新亞書院哲學大師唐君毅、牟宗三，國學根基一定好過左丁山多多聲，但佢對流行文化、廣東俗語甚有研究，根據賜官研究，小學生必讀「九因歌」（乘數表）、三六一十八、三七二十一，人人識背。古老神話中，地獄有二十一層，後來演變成十八層，出於《管子》：「三七二十一而至於泉」，泉是黃泉之泉。廣府人來自中原，保留中原古文化，「三七二十一」代表最下層地獄，引伸為最下下、最惡劣嘅環境，即使衰到貼地，也在所不計。
賜官嘅研究，就快公諸同好，詳細向網民解釋「二五仔」、「山卡喇」、「菠蘿雞」、「較飛」、「西南二伯父」、「唔使問亞桂」、「依撈七」、「七個一皮」、「錢七」、「老世」等等廣東俗語嘅來源，用法。上邊個網，就係香港電台e-leaningrthk.org.hk/（