由成班政府高官所養嘅馬仔「勝任愉快」，前個周末跑第三輸咗，相隔一周，噚日第六場「香港會盃」又再跑過。上次馬主「新秀團體」班女高官，包括俞宗怡同尤曾家麗成班人，已經拉大隊入場打氣，好可惜失望而回，到噚日佢哋又再入場幫愛駒造勢，重着到靚一靚準備拉頭馬。唔知係唔係啲馬迷見有女高官坐鎮，以為必勝無疑，齊齊捧場，賠率到最後幾分鐘得番三點七倍。
喺最後二百米，「勝任愉快」同隻「玩斗星」鬥足半條直路，八方當時見到俞宗怡同尤曾家麗個樣，簡直重肉緊過佢哋老細阿董喺立法會答問嗰陣。好可惜「勝任愉快」最後都係Win唔到，只係跑第二。講番隻「勝任愉快」周歲價十二萬澳元﹙約五十四萬七千港元﹚，抵港後跑五場得一Ｗ三Ｐ，共贏獎金七十三萬幾，七除八拆後都應該差唔多歸本，之不過隻馬𠵱家都只係三歲，只要健康正常，將來大把機會啦。
﹙圖﹚俞宗怡（右四）同尤曾家麗（右）着到靚靚入場，可惜隻愛駒唔生性，只係跑第二。
傳真︰2623-9278
電郵︰