早前才響美國底特律車展上，作首度曝光嘅新一代BeetleCabriolet，日前經已抵港，而代理方面更隆重其事，為其舉行咗一個簡單而隆重嘅登場儀式㖭！
儀式舉行當日，吸引到唔少嘉賓及傳媒到場參觀或採訪，而當蓋着新款BeetleCarbiolet嘅布幕揭開後，新車便呈現響大家眼前，而且重係亞太區首度曝光㖭！依舊保留有原有Beetle得意可愛造型嘅開篷版，仍見來得魅力十足，當換上電動軟篷頂後，就變得更具吸引力；同時，廠方更提供有十種車身顏色同三種篷頂顏色選擇，以求迎合不同用家嘅口味。
車廂設備亦見齊全，而真皮座椅亦見有十足承托力，當然唔少得重有一台能輸出115匹馬力嘅2.0公升引擎，以及一套6前速Tiptronic波箱啦！
雖然呢部BeetleCabriolet只會在港展出一段非常短嘅時間，但大家最快可於今年年中前能一睹其風采，又者係或擁有之；另外，快將上畫、並由梁朝偉及楊千嬅主演嘅賀歲電影「行運超人」中，亦會見到BeetleCabriolet蹤影㗎！有興趣嘅朋友，記住唔好錯過喇！