噚日嘅施政報告政策綱領記者會，教育統籌局局長李國章、衞生福利及食物局局長楊永強同民政事務局局長何志平，一齊講「公義仁愛」，咁啱三個從政前都係醫生，一個外科一個內科，再加一個眼科。
李國章一見記者就講笑話：「今日有三個醫生見你哋，有乜嘢病都唔使驚。」楊永強跟住喃喃自語，八方聽到佢好似話「有病就驚嘞」。跟住輪到何志平表現佢嘅幽默感，一聲「開診」，記者會正式開波。
三位醫生局長到底有幾「老友」？有熟識佢哋嘅醫學界人士畀咗三個貼士大家自行領會：一、李國章同何志平曾經喺同一醫院共事；二、楊永強港大畢業，做過醫管局行政總裁；三、李國章做中大校長時，為咗揮低港大，向醫管局力爭資源。
呢鋪李國章一手湊大嘅中大醫學院痛失肝移植中心，同門戶之見、個人利益有冇關係，其實個個醫生都心中有數。三位局長坐埋一齊，可唔可以齊心幫香港斷症，就真係天知曉。
傳真︰2623-9278
電郵︰