聖士提反書院百周年校慶高球友誼賽噚日喺粉嶺高爾夫球會舉行，立法會主席范徐麗泰同老公范尚德拍拖參加，重見鄭慕智、鍾普洋同黃乾亨等人齊齊揮桿，難怪做搞手嘅聖士提反校董練松柏律師話，叫人嚟打波，易過搵人食飯好多。
做咗四十年聖士提反書院校董嘅練律師，講起歷史，滔滔不絕。原來三位創校者就係大名鼎鼎嘅何啟爵士、周少岐議員同曹善允博士。佢哋希望下一代接受英式貴族教育，又唔想身嬌玉貴嘅公子千金坐幾個月船去歐洲，所以出錢仿效伊頓公學，喺香港搞一間「東方伊頓」。周少岐兒子周竣年大律師、姪兒周錫年，同鄧肇堅爵士、吳光正、錢果豐、董建成、林子祥……結果都成為東方伊頓舊生。
重有龔如心夫婿王德輝都係聖士提反人，當年練律師同佢住正隔籬宿舍，王德輝一反斗，校長馬田神父就會帶佢去學校教堂，一齊跪低祈禱，王德輝據說好百厭，係咁多年唯一一個被趕出校嘅學生。
練律師對八方透露咗一個秘密，原來呢間名校嘅校董會主席已經懸空三年，佢自己一心退休，只肯做副主席，曾經搵過吳光正、董建成等人，都唔肯制。八方相信好多人打崩頭想做，不過未必咁易合練律師眼緣。
傳真︰2623-9278
電郵︰
