人多車多，烏煙瘴氣，方寸淨土難尋，油麻地給你的印象，大概如此。有空，不妨上老牌冰室與老闆娘吹吹水；口痕，可以到老店吃碗甜入心糖水。這裏可以買到獨一無二的茶壺、絕版武俠小說、精緻木製品，還可以即場來個臨時紋身。這樣的油麻地，是否可愛點？
記者：陳漢榮
攝影：彭自維
縱然距店三呎是塵土飛揚的爛地盤，但很奇怪，登上二樓雅座，感覺一切靜下來，人變得輕鬆，難怪退休享清福的婆婆伯伯、努力溫習功課的學生、西裝筆挺的上班族、手執馬經的地盤佬，都愛在這裏坐上一會，貪的，就是這份寧靜感。
老闆娘小黃反而最嘈吵，因不願上鏡的她愛說話，喜與客人話當年：「我每日唔同班熟客傾過偈都唔安樂，呢度最出名係焗排骨飯，好多㗎妹專登嚟幫襯，講以前呀，唔……李嘉欣喺度攞景影相囉，棟篤企（笑）嗰個黃子華同埋羅（張）達明都鍾意落嚟食下午茶㗎，重有呀……」食物未到，已教你停不了口。
新鮮排骨，永無隔夜貨，飯先炒底，再與排骨一起焗，問有幾馳名，小黃答：「最高紀錄一日賣100碟。」
即是新鮮雞雜炒麵，雞膶、雞心、雞肫勁彈牙，蛋麵底煎得勁脆，師傅好心機，雞肫剪成花狀，襯蝴蝶形薑片、飛鳥形蘿蔔片，睇得又食得。
好味西多士，原來很簡單，小黃：「浸足5分鐘，等蛋漿完全滲透麵包才油炸，配鮮牛油，罐頭牛油無牛油味㗎，呢啲咪心機同誠意囉！」
店名：美都餐室
電話：23846402
地址：廟街63號地下
營業時間：早上8時至晚上10時
座位數目：120個
老闆娘劉太很感慨：「間舖係老爺留落畀我兩公婆，都25年嘞，以前老爺喺廣州開咗檔『又記』，淨賣白粥油炸鬼，生意好，賺到笑，落嚟廟街開舖就留番個招牌喺度，諗住『又記』個名好意頭嘛！點知𠵱家經濟咁差……」長嗟短歎完，劉太又忙着執拾、抹枱、收錢，幹粗活。
驟眼看，甜品館生意不俗：「價錢抵係原因，雖然成日話香港窮，十元八塊一碗糖水，人人都消費得起，但最緊要都係真材實料，咁先有回頭客。」除了生意興隆，劉太還希望所有客人可以認真唞一唞：「我知生活艱難，但食到趕頭趕命邊係歎糖水？慢慢食，食完笑住走，人先會開心嘛。」說得好。
劉太：「黑珍珠係植物種子，中文名唔知叫乜，英文名又唔識串畀你聽，總之植物纖維豐富，有降膽固醇功效。」看賣相，黑珍珠比普通西米更佳，口感，有過之而無不及地彈牙。
兩皮一大粒，劉太：「要做到粒粒一樣大又唔爆口，好考功夫。」大小有相干？「梗有！有客投訴過佢碗湯圓細粒過隔籬嗰碗，唉！都怪經濟唔好……」
冰花燉雞蛋$12（左）
說甚麼又滑又甜沒意思，只知用料是農場牛奶，每日新鮮運到，這就是真材實料。
店名：甜品館
電話：23885845
地址：廟街124A號地下
營業時間：上午11時半至午夜12時半
座位數目：30個