港股噚日以中字派概念股表現最為出色，其中格林柯爾（8056）勁升40%，收0.61元；浙江玻璃（739）勁升29.7%，收1.22元；正中藥業（327）亦勁升25%，收4.5仙。港股成交亦集中在中資股身上，20大成交股份中有14隻都係中字派。
市場盛傳有中資熱錢流入炒中資股，事實上港股噚日成交金額增加至75億元，反映有真金白銀流入港股。黑客話，每逢年初都會有中資流入炒港股，今年似乎唔例外，特別A股表現不濟，QFII資金又未到位，在港上市的H股相對於A股仍價廉物美。
有一位中資朋友話畀阿虎知，中資一樣可從正當途徑流入香港，只不過在兌換時要向中國繳交7.5%稅率，而且一旦流出，如無必要都唔使回流國內。由於A股PE較H股貴好多，就算國內資金畀7.5%稅後流入香港炒H股，心理上條數計起嚟重係好化算，況且中央已認為國內經濟出現泡沫，可能要出手調整一吓，所以國內資金確有需要搵投資出路。
華燊燃氣（8035）突然獲得美資大行高盛證券垂青，投資評級被調高至跑贏大市，股價噚日即勁升10%，收0.99元。
據i師傅話，華燊燃氣在國內投資空間唔細，雖然賺唔賺到錢係日後嘅事，但現時可以肯定嘅投資額頗為龐大，必須進行融資。噚日高盛與大摩大力掃貨，唔知係咪為日後華燊融資鋪路？
立信工業（641）噚日出現一宗4000萬股大手成交上板，造價2.20元，成交金額達8800萬元，據聞呢批股份係大股東沽畀基金經理。此股過去1年已勁升2.5倍，大股東出貨亦係時候，後市重有冇得升，就要睇吓基金有幾多彈藥。
阿虎