保時捷車廠繼早前推出旗下史上首部SUV─Cayenne後，響今年3月又會為旗下嘅911車系，推出新一代GT3型號，以吸引更多車迷注意。
從外表看來，新一代911GT3與現有型號相近，但當細心留意下，定能發覺一組尾翼經過改良，能有效改善高速行車時嘅氣流擾動情況，從而令車子可有更佳嘅下壓力，令行車倍見穩定，而車頭氣霸亦略有改動，望落可謂跑味十足。車廂布局則與現有型號相同，未有作出大幅度修改；不過一台3.6公升水平對向引擎嘅馬力輸出，就較前多出21匹（達381匹），亦比配用相同容積引擎嘅Carrera型號多出61匹，就連引擎Red-zone亦改為8200rpm，較現有型號高出400rpm，加上同樣有增加嘅扭力輸出，難怪新車0至100公里加速度僅為4.5秒，而極速更可高達306km/h咁快㖭！
同時，一套跑車懸掛組合亦比同廠Carrera型號調低多30mm，並用上前輪235/40ZR18及後輪295/30ZR18嘅輪胎組合，配合上剛度十足嘅車架，從而可有更出色操控表現；制動系統更可用上保時捷獨有嘅PCCB（PorscheCeramicCompositeBrake）煞車碟，務求可達致收放自如嘅效果㗎！新車將於三月喺歐洲市場推出，未知香港代理會否引入呢？