電腦發燒友朝聖地高登電腦商場，不經不覺已於深水埗屹立了二十年。回想電腦價格高企不下的年代，「黃金嘜」電腦成為幾許學生的恩物，想當年記者都曾在此DIY過一部電腦。雖則現時牌子機的價格下調，但對砌機情有獨鍾的朋友，逛腦場始終是一種享受，而最大發現的，還是砌機已經不局限於桌面機種，就連手提電腦都可以度身訂做，還比牌子機平近兩成。
記者：周麗懿
攝影：梁細權
ImageGirl：Marcella
在高登開檔近二十年的Centralfield，一向是砌機人士的價格指標，有心來商場買配件的人，都必先到其檔位望一望，然後才扑鎚。
原來除了桌面機外，現在就連手提電腦都可隨心所欲地選擇啱心水配件DIY。這個名為BTO（Build-To-Order）度身訂做的手提電腦，由處理器、硬碟和記憶體，以至屏幕大小都可自己話事，除了價格比牌子機平約兩成外，最理想是主要的內部零件可於日後升級，毋須因規格落後而被迫放棄整部手提電腦。
除非是DIY一族，否則買砌機大部份都是一站式買配料和裝嵌，據康藝科技的Danny說，以前好多人都會一擲過萬，砌部性能超強的電腦，現在經濟不景，買機的人有六成都是以平價為首選，但另一方面，由於電腦的技術日益提高，今時今日2、3千都可砌到部性能不俗，兼可剪片的機種。
好似這部$2,999的主機，就已經配備P4Celeron1.7G的處理器，採用天揚的All-In-One主機板，有齊6個USB2.0、256MBDDRRAM和寬頻必備的LAN，加$99還可以將CD-ROM改為CD-RW。
數今期電腦大熱產品，又怎少得LCD份？事實上，LCD質素較高之餘，重夠晒慳位。據Centralfield的店員Chole講，現時比較熱門的是15吋機種，其中強調零光點零死點的TOPCONL6-150（$1,990），算是近期熱賣首選，因為價錢2千蚊有找。
至於其他新機，AVTV的LCD亦是近期新貴，除了睇電視，還有畫中畫功能，價錢唔使3千，唔想同屋企人爭電視睇，添番部就得啦！
潮流興玩數碼相機，行落高登，再向福榮街方向走，便去到數碼相機發燒友必去的ProSource，無論水貨同行貨都有齊，老闆Jackie話因為他每星期都去日本一次，所以新貨返得快。
而近期最好賣的便是濱崎步做代言人的PanasonicLumixF1，上個月賣出近二百部，機身顏色有紅、橙、藍、銀、黑選擇，齋睇已夠吸引，加上名廠Leica鏡頭，難怪一出就賣個滿堂紅。至於二手機方面，屬於二輪新機很多都很新淨，而價錢就比新機平約2千蚊，水頭不足又想買機，不妨考慮。
店舖資料
CentralfieldComupterLtd.
電話：23870272
地址：高登電腦中心一樓10-13號舖
康藝科技
電話：23079084
地址：高登電腦中心一樓91號舖
ProSource
電話：27297222
地址：福榮街131號高登33電腦廣場地下C,D舖