「領隊攞獎球隊冇運行」<br>假日求驗客:請史特根爭氣

「領隊攞獎球隊冇運行」
假日求驗客:請史特根爭氣

本報名家貼波都好有自己一套,唔鍾意隨波逐流,更加唔信邪,好似上個禮拜華度就無懼曼聯專剋甲組榜首隊,喺足總盃貼樸茨茅夫下盤,雖然衰咗,但勇氣可嘉;今日蘋果波神亦唔怕「攞親超聯本月最佳領隊,球隊都冇運行」呢個定律,喺三串四過關推介中,推介啱啱攞咗超聯十二月最佳領隊史特根領軍嘅修咸頓,可作客和米杜士堡。
並唔係我求大俠危言聳聽,不過,今屆攞親本月最佳領隊嘅球隊真係好邪,好似八月嘅熱刺領隊荷杜、九月嘅阿仙奴領隊雲格、十月嘅利物浦領隊侯利亞同埋十一月嘅愛華頓領隊莫耶斯咁,佢哋攞完獎後,球隊成績都麻麻。不過,既然蘋果波神咁有信心,認為修咸頓可以作客和波,加上佢喺過關三串四又的確成績驕人,球迷如果啱心水嘅話,不妨跟一跟。

摩蘭奴寸老查博出位
意大利球迷死敵摩蘭奴前晚上意國電視台節目《愚人酒店》做諧星,節目播映前佢又發表偉論,話想同國家隊教練查柏東尼對質,死都唔認自己喺世界盃意大利對南韓吹死意大利。佢最寸係話:「我想知點解意大利咁水皮,入得一球?」重話畀佢吹多次都會判托迪插水。呢位過氣判官咁識博出位,有望做新一代笑匠。

捧網隊拓荒者一殼眼淚
噚日我求大俠興致勃勃晨早起身諗住睇番場好波,點知睇見臨場受讓四分嘅帝王㩒住網隊嚟打,未到半場已經狂數成二十幾分,真係估唔到網隊今次輸得咁羞家。跟住拓荒者主場對馬刺,喺完場前四秒竟然俾馬刺嘅柏加射入一球,上盤變下盤,又累到啲上盤客一殼眼淚!

熱刺內訌球員左右做人難
熱刺聽日至有波打,而佢哋嘅德國國腳薛基重創後已喺禮拜四復操,本來可喜可賀,不過熱刺呢排立立亂,球會發生權力鬥爭,球員唔知聽領隊荷杜、會長李維,定足球總監柏列特支笛。咁講法《蘋果波經》推介熱刺嘅對手定博熱刺反底呢?大家聽日咪知囉!

傑斯揸棍波車累事
點解曼聯快翼傑斯過去十年大腿成日受傷?知唔係畀佢啲跑車累囉。有專家話揸棍波車對足球員隻腳唔係咁好。聽講傑斯𠵱家少揸跑車,所以咪冇乜點傷,但係表現又唔算太好,入球同助攻都少咗,最近重喺聯賽盃畀自己球迷噓。希望佢喺今日對西布朗踢番場爭氣波啦!

保耶被逐有得博
講開英超聯,禮拜六韋斯咸迎戰紐卡素雖然冇直播,不過都幾有瞄頭,皆因由列斯轉會韋斯咸嘅保耶會首次登場。由於保耶一向紀律麻麻,有博彩公司都開出佢喺對紐記呢場波攞黃牌及被逐嘅賠率,攞黃牌有三倍,被逐則有二十一倍,都幾抵死。
逢周六、日見報