中年女星同筋肉人拍拖，好多人都話男嗰個為錢先同女星一齊，因為筋肉人啲朋友同女星年紀差一截，大家冇偈傾兼有代溝，而女友啲friend又唔鍾意筋肉人，所以佢哋啱啱拍拖嗰時，大家都唔睇好，不過女星一於好少理，人前人後都同筋肉人晒恩愛。
唔經唔覺女星同筋肉人都拍咗拖年幾，女星為咗男友，又搬大屋又買家具，擺到明唔怕俾人笑。上個禮拜，筋肉人同女星喺尖沙嘴名店瘋狂購物，筋肉人好似好耐冇買過嘢咁，買咗成十幾萬嘅嘢。𠵱家咁嘅經濟，男人老狗一次過買十幾萬衫都好鬼誇張，舖頭入面啲人對筋肉人都眼望望，最後由女星碌卡搞掂，佢完全唔介意俾人知筋肉人使佢啲錢。
本來呢啲嘢你情我願，旁觀者都冇話可說，不過筋肉人咁樣使錢法，真係多多都唔夠，容乜易坐食山崩，馮仁昭都替女星擔心。
容祖兒噚日同吳浩康喺中環拍攝新歌《他都不愛我》MV，對於近日有關Twins、陳冠希、陳文媛、張栢芝同余文樂錯綜複雜嘅男女關係，容祖兒原來都有日日追住睇，就好似睇愛情小說同奇情小說咁，但佢就從來冇主動問同公司嘅Twins個實情。馮仁昭覺得好奇怪，乜祖兒睇小說唔興睇埋結局係點㗎咩？
蘇永康喺樂壇有「阿公」嘅稱號，前晚佢去尖沙嘴出席活動，講起余文樂同陳冠希發生衝突嘅事。佢話：「其實件事係真定假都係小風波啫，希望佢哋可以經一事長一智啦。」問佢會唔會做和事老？佢話：「邊輪到我？不過我就唔鼓勵人爆粗，我自己𤷪𤺧時都係講單字粗口啫。」
安雅三月將會喺香港藝術中心麥哥利小劇場，首次反串演出英文舞台劇《GlengarryGlenRoss》，呢套劇以前改篇過西片《推銷員之死》，由金像影帝阿爾柏仙奴（AlPacino）主演。安雅話：「好高興能夠扮一個強悍嘅男人，我重會喺入面講粗口。」
目前無約一身輕嘅林憶蓮，喺華納嘅誠意感動下再出唱片，雙方決定以冇合約嘅方式喺今個月底合作推出《最好的…林憶蓮》新歌加精選專輯。憶蓮重睇中英國嘅R&B男歌手CraigDavid，所以決定翻唱佢嘅《Worldfilledwithlove》當新歌，可謂識英雄重英雄！
李克勤同李雲迪嘅師叔中國鋼琴家劉念劬噚日喺無綫電視城綵排《慈善星輝仁濟夜》。克勤等咗十七年終於喺日前攞咗無綫嘅最受歡迎男歌星獎，但係就比余文樂同陳冠希嘅打交新聞蓋過晒，克勤就話自己不嬲唔係頭條躉，佢話𠵱家上親頭條都唔係好嘢，唔知係咪話緊余文樂同陳冠希！
